Shillong, Nailur, 05: Uwei u briew uba la kham ïaw ka rta, u la shah kem ha ki Pulit hadien ka Dorbar Shnong Mission Compound, Shillong ka la ïoh bat lyngba ka jingujor jong kawei ka samla kynthei kaba ïaid lynti lyngba kane ka shnong da kaba kynnoh ba une u rangbah briew u la leh kynshleiñ ïa ka.
Katkum ka jingïathuh jong u Asst. Rangbah Shnong ka Mission Compound, u Bah TB War, utei u briew uba dei u nongñiah kali taksi kamai u la pynieng ïa ka kali jong u ha Mission Compound ha ka por 4 baje janmiet ha ka sngi Baar.
“Ki don ki briew kiba ïathuh ba ki la ïohi ïa une u briew ba u ïaid swait sharum shaneng. Jia ryngkhat ba don iwei i samla kynthei, iba dang ïaid lynti, une u briew u la peit video khlemakor bad leh kynshleiñ hakhmat ine i samla kynthei dang ïaid lynti,” ong u Asst. Rangbah Shnong.
“Ha kane ka por, ine i samla kynthei, i la pyntip sha uwei u samla uba na Laban ïa ka jingleh kynshleiñ jong une u briew ha kaba la ïoh bat ïa une u briew ban tohkit,” u la ong.
Katkum ka jingïathuh jong u Asst. Rangbah Shnong, kane ka jingjia ka la jia ha ka por kumba 5:00 baje janmiet.
“Haba ngi la tohkit u la pyrshang ban thok, hynrei ynda ngi la ai jingsneng u la phla ba u la leh ïa ka kam,” u la ong.
U Bah War u la ïathuh wat hadien ba ki trai kali ki la kyrpad ban pylllait ïa u, hynrei ka Dorbar Shnong kam shym la pyllait satia namarba ba ka kam kaba u la leh ka la long pyrshah ia ka aiñ. Ki Pulit ki dang pynlong ka jingtohkit kaba bniah shwa ban pynngat ïa u ha ki kyndon aiñ.
