Nongpoh, Jymmang, 04: Ha ka jingleit khynra bad da ka jingïatrei lang ki bor shnong bad ki VDP, ki bor Pulit ka Nongpoh Police Station ha ka sngi Saitjaiñ ki la ïoh ban kurup ïa kawei ka dukan ryngkat ki Klong Petrol bad Diesel ba la kynnoh ba la die beaiñ ha kawei ka dukan ha ka shnong Quinine.
Kane ka dukan la kynnoh ba ka dei ba la long trai da u Bah Omiwell Marbaniang na ka Shnong Shangbangla ha Ri Bhoi District.
Kumba la ïathuh da ki Pulit ka Ri Bhoi, la ong ba ha katei ka jingleit khynra la ïoh ban kurup kumba 101 litre ka Umphniang Petrol bad 84 litre ka Umphniang Diesel ba la kynnoh ba la dei beaiñ sha ki paidbah ha ka dor kaba rem.
Ka tyllong khubor na ki Pulit ka Ri Bhoi ka la kynnoh ruh ba wat la u trai katei ka Dukan ba u la leit thied ïa kitei ki Umphniang na ki Petrol Pump ban die pat sha ki paidbah, hynrei la suba ruh ba ïa kitei ki umphniang petrol bad diesel la tuh na ki Mobile Tower bad na kiwei ki jaka.
Ki Pulit ka Ri Bhoi ki la pynshai ruh ba ki Petrol Pump kim dei ban die ïa ki petrol bad diesel ha ki klong umphniang ne ha ki bitor, namar lada ailad kumne ban thied ïa ki Petrol bad diesel ki lah ban pyndonkam ban leh ïa kiwei kiwei ki kam sniew kiba ktah ïa ka imlang kasahlang.
La pynshai ruh ba ka jingdie petrol ne diesel sha kiwei khlem da ïoh bor na ki bor ba dei peit ka long beaiñ bad na ka liang ki bor Pulit ki la tohkit bniah bad ki la leh katkum ki kyndon jong ka aiñ hadien ba la ïoh ban kurup ïa kitei ki umphniang Petrol bad Diesel.
