Kynjoh 4 sngi ka jingïakhih ka KSU ban dawa pynkylla ha ka kam thung nurse ha NEIGHRIMS

Shillong, Jymmang 04: Ka jingïakhih shong kyllaiñ myngngor jong ka seng Khasi Students’ Union (KSU) ka la poi sha ka sngi kaba saw ha ka sngi U Blei ban pynbor ïa ki bor pynïaid jong ka North Eastern Indira Gandhi Regional Institute of Health & Medical Sciences (NEIGRIHMS) ban pynurlong ïa ki jingdawa jong ka kiba kynthup ïa ka jingpyntreikam ïa ka 80:20 female-to-male ratio ha ka kam thung kam nurse ha kane ka jaka pule.
Na ka liang ka union ka la pynbna ruh ba kane ka jingïakhih pyrshah kan ïaibteng hadien ba ka la kyntait ïa ka jingkren jong u Director ka NEIGRIHMS u Dr N Mehta uba la ong ba kane ka jaka pule mynta ka dang ap ïa ka jingmynjur jong ka Ministry of Health & Family Welfare haba ïadei bad kine ki jingdawa jong ka seng KSU.
“Ngi kyntait ïa kane ka jingaidaw jong u director. Ki jingdawa jong ngi ki long kiba shai ba ka NEIGRIHMS ka dei ban wanrah ïa ki mat treikam kiba kongsan kumba la leh sha kiwei pat ki jylla ban pyntreikam ïa ka 80:20 female-to-male ratio,” pynpaw u chairman ka KSU employment cell u Samla Reuben Najiar da kaba bynrap ba na ka liang ka union kan ïaibteng ban pynlong ïa kane ka jingïakhih shong kyllaiñ myngngor kaba khlem buh por tat haduh ba ka NEIGRIHMS kan long kaba khreh ban pynurlong ïa baroh ki jingdawa.
Haba kylli, u Najiar u la ong ba ka All India Institute of Medical Sciences (AIIMS), Regional Institute of MEdical Sciences (RIMS) ki la pyntreikam ruh kumjuh ïa ka 80:20 female-to-male ratio bad ki khlem pan ïa ka jingmynjur na ka Ministry of Health & Family Welfare naba ki don ïa ki rukom treikam kiba biang ha kine ki jaka pule jong ki.
“Ka Ministry ha ki shithi ba la phah mynshwa ka la ai jingmut ba ka NEIGRIHMS ka donkam ban pynkylla ïa ki rukom treikam ha ka thungkam thungjam ne ka recruitment policy jong ka. Ka governing council jong ka NEIGRIHMS, kaba kynthup ïa ki nongmihkhmat na ka ministry, ka sorkar jylla kynthup ïa u director bad kiwei ki heh sorkar ki lah ban shim khia ïa kane ka kam ha kaba ïadei bad ki rukom treikam kaba ym da donkam than ban ïoh ka jingmynjur na ka ministry. Namar kata baroh kadei tang ka mon ban leh,” u la bynrap.
“Lada ka ministry ka shah ïa ka AIIMS, RIMS ban pyntreikam ïa ka 80:20 female-to-male ratio balei pat ka khang ïa ka NEIGRIHMS ban leh ïa kane ka juh ka kam?” buh jingkylli u Najiar.
U la bynrap shuh shuh da kaba ong, “Na ka liang ka ministry ka khlem khang satia hynrei ka jingeh hangne ka dei ba ka NEIGRIHMS kam don ïa ki mat treikam haba ïadei bad kane ka kam. Ngi la shim khia ïa kane ka kam naduh u snem 2023 hynrei na ka liang u Director um shym la lah satia ban wanrah ki sienjam kiba donkam na ka bynta ban wanrah ki jingkylla haba ïadei bad ka kam thungkam thungjam.”
Haba ïadei pat bad kiwei ki jingdawa jong ka union, u chairman u la ong, “Kawei pat ka jingdawa jong ka union ka dei halor ka rta thungkam ha kaba baroh ha kine ki snem la pynpaw ba ki samla kiba kwah rung kam nurse ki dang lah ban aplai wat haba ki la kynjoh ïa ka 35 snem ka rta bad mynta pat la pynhiar sha ka 30 snem.”
“Ngi la ïai dawa ruh ba ïa ka jaka ïaleh eksam thungkam ne ka job examination centre dei ban buh ha Shillong,” u la bynrap.
Shuh shuh u Bah Najiar u la ong ba ka union ka la dawa ruh ban bishar kam mardor ha kaba ïadei bad ka roster register.
“Ngi la dep ban ïohi ïa kiba bun ki jingduna ha ka roster register. Ha ka jingshisha ki la wanrah ruh ka jingpynkylla haba ïadei bad ki jingpynbna kiba mynta ha kaba katto katne ki seat na OBC la phah sha ka open category. Kane ka la paw shai ba ka don ka jingleh bakla ne jingduna haba ïadei bad ka bhah thungkam ha kaba ka jingdawa jong ngi ka long ba donkam ban bishar mardor biang ïa ka roster register,” u la bynrap.