50 tylli ki skul yn jied ka sorkar ban shna kamra klas na bynta ki skul Higher Secondary

Shillong, Jymmang 04 : U Myntri Rangbah ka jylla u Conrad K. Sangma ha ka sngi saitjaiñ u la ong ba ka sorkar ka dang don ha ka jingpynkhreh ban jied ïa ki 50 tylli ki skul ha kylleng ka jylla khnang ban ïoh mang pisa na ka bynta ban shna shuh ïa ki kamra klas ba thymmai hadien ba la pynkha pat sa ïa ka Higher Secondary School.
U la ong ruh ba kane ka skim kan kynthup lang naduh ki skul sorkar bad kumjuh ruh ha ki skul jong ki riew shimet, kaba long katkum ka jingdonkam na kabynta ka Higher Secondary. Shuh shuh u ong ruh ba ki skul kin hap ban pynbiang ïa ki kyndon ba la buh da ka tnad Pule Puthi ka sorkar jylla kum ka jingdon ki khynnah ba wan rung klas, ka jingdon kiba pass na u snem ba la dep bad kiwei kiwei.
“Ki skul ha kito ki jaka ba la jied kiba pyndep ïa ki kyndon ba la buh da ka sorkar kin ïoh ïa ka skhim na ka bynta ka jingïarap ban tei ïa kitei ki kamra klas thymmai kaba long tang shisien,” u la ong bad bynrap ba kane ka sienjam ba la shim ka long ban pyntikna ba kito ki samla ba pass ïa ka Matrik kin ïoh ban rung klas sha ka Higher Secondary.
Ïa kane u Myntri Rangbah ula kren haka jingïalang plie ïa ki kamra klas thymmai jongka Bidanchi Higher Secondary School, Tura. Ïa ki saw tylli ki kamra klas thymmai la tei da ka jingïarap pisa na ka Chief Minister’s Special Development Fund (CMSDF). Ha kajuh ka por u la pynbna ruh ba yn ai sa 10 lak ïa ka skul na ka bynta ka jingsdang ïa ka higher secondary naduh kane ka samoi pule.
Da kaba ïaroh ïa ka tnad Pule Puthi, kaba la don ka bynta kaba khraw na ka bynta ban ïarap ïa ki khynnah skul na ka bynta ban pynkhreh ïa ka eksam klas 10 kynthup ïa ka CM-IMPACT guide book, u Myntri Rangbah u la ong ba man u snem ki don beit kumba 60,000 ngut kiba thoh ïa ka eksam matrik hynrei ka jingpass ka long tang kumba 25 persen khamtam eh naki nongkyndong. Kumta u ong ba kane ka sienjam ba ki leh mynta u snem ka la long kaba seisoh naba bun ki khynnah ki la ïoh ban pass bha ïa ka eksam.
U ong ruh ba watla ki don bun kiba wohdong hynrei u ong ba naka sorkar bad na lade shimet u sngew kmen ba ki don bunki khynnah kiba la pass ïa ka eksam bad ba kin ïoh ban bteng ïa ki jingpule kiba kham shajrong.
Katkum ka jingong jong u Myntri Rangbah, kane ka jingïarap kaba ka sorkar ka lah ban kot wat shaduh 50 lak tyngka ruh na ka bynta ban tei ïa ki iing skul.
Haba kren pat halor ka jingnoh synniang jong katei ka skul ha Tura, u Myntri Rangbah u la ai ka jingïaroh ïa ki bor pynïaid skul na ka bynta ka jingbteng ban kyrshan bad ka jingshakri ïa ka imlang sahlang wat hapdeng bun ki jingeh ha ki snem ba la dep. U la ai ruh ka jingïaroh ïa ka jingtei ba thymmai ba ai kyrteng da ka ‘Active Learning Centre’ ha Bidanchi School.