Nongpoh, K’lyngkot 16: Kumba ka election MDC ban jied ïa ki nongmihkmhat sha ka KHADC bad JHADC ka la sdang khluid katba dang mih ki sngi bad ha ka sngi Palei, ki nongïalam bad ki nongkyrshan jong ka Umroi Constituency Progressive Forum (UCPF) ki la pynlong da ka jingïalang ha Umroi Umdohbyrthih ban khylliap lama ïa kane ka Forum bad ki la shim pat ïa ka rai ban kyrshan noh ïa u kyrtong ka Party Congress uba la leit ban pynïasnoh na ka UCPF dang shen sha ka seng Congress.
Ha kane ka jingïalang la don ryngkat u Bah Pynskhemlang Sohtun uba long u President jong ka UCPF, u Bah Remius Kharsati uba dei u Vice-President, u Bah Forstar Sohiong uba dei u General Secretary lem bad kiwei pat ki nongïalam bad nongkyrshan ka UCPF.
Haba kren sha ki lad pathai khubor hadien ka jingïalang, u Bah Pynskhemlang Sohtun u la pynpaw shai kdar ba ka daw kaba la pynlong ïa ki nongïalam bad ki nongkyrshan jong ka UCPF ban kyrshan ïa u kyrtong ka seng Congress ha ka election MDC, ka dei na ka daw ka jingshah buh jingkylli ha ki paidbah haba ki leit ban ïalap elekshon ba ki la kylli shano u kyrtong ka UCPF un leit ban pynïasoh lada u la jop na ka Umroi Constituency.
U la ong ruh kum ki nongïalam ka UCPF, haba ki sngew ïa ka sur jong u paidbah babun balang jong ka Umroi Constituency, ki la ju pynlong ïa ka jingïakynduh lang na ka por sha ka por bad dei lyngba ka jingïakynduh lang la bunsien ka la mih ka sur ba kin rai noh ban ai ka jingkyrshan ïa u Bah M.D Syiem, uba dei u rangbah uba la ïoh ticket na ka party Congress.
Kumba la paw na ka jingkren jong ki nongïalam ka UCPF bad kiba la shim rai ban kyrshan ïa ka party Congress, ki la pynpaw ba ka jingrung paidbah sha ka Party Congress kan long ha ka 21 tarik mynta u bnai ha madan Umroi. Kine ki nongïalam ki la kyrpad ïa kiwei ruh ba kin wan sakhi lang ha kane ka sngi ban pyniasoh sha ka seng Congress na ka bynta ban kyrshan ïa u kyrtong ka Congress ha ka election MDC 2025.
