Shillong, K’ Lyngkot 16: Ka Hynñiewtrep National Youth Front (HNYF) ha ka sngi Palei ka la pynlong ïa ka jingïakhih bad ka jingpyrshah ban dawa na ka sorkar jylla ban pyndam noh ïa ka jingmut ban buh ïa ka Land Bank naba ka long kaba ïapyrshah bad ka Meghalaya Transfer of Land (Regulation) Act, 1971.
Kane ka wan tang shisngi hadien ba ka kynhun myntri ka sorkar jylla ka la mynjur ban wanrah jingpynkylla ïa ka Meghalaya State Investment Promotion and Facilitation Act, 2024 (MSIPF), kaba pynthikna ba kan ym dei ban don ka jingïatyngkhuh bad ka Meghalaya Land Transfer Regulation Act, 1971 haba kyntiew ïa ka jingwan pynlut ha kane ka jylla.
Haba kren sha ki lad pathai khubor u President ka HNYF u Bah Sadon Blah u la ong, “Ngi donkam ban pynlut bad ban theh pisa, ngi donkam ruh ïa ki karkhana, hynrei kane ka jingmut ban thaw ïa ka Land Bank ka long kaba ma bha na ka bynta ka jylla Meghalaya.”
Haba dawa ïa ka sorkar jylla ba kan ieh noh ïa kane ka jingmut, u Bah Blah u la ong, “Ngi dawa ba kan long kaba bha na ka bynta ka sorkar ba kan pule bniah biang ïa ka rukom bat khyndew kaba la don naduh mynshwa ha kane ka jylla. Kum ki Myntri ba kynthup ïa u Myntri Rangbah ki la ong ba kam shym la don ka jingïapher na ka rukom treikam kaba mynshwa kum ki agency jong ka sorkar kum ka MIDC, MTDC kiba shait thied ïa ka jaka, hynrei ka phang hangne ka long ba baroh kine ki tnat ki la kiar noh sha lyndet hynrei hangne, ka jingpynsuk kaba ka sorkar ka la thaw ka long kaba ban beiñ bad shisien ba ka la long kaba thombor kaba mut kadei kaba ym shym la pdiang sngewbha satia hapoh ka jylla.”
U la ïathuh ruh ba ka seng ka la dep phah ïa ka shithi sha u Myntri Rangbah ha ka 20 tarik u Nohprah mynshem snem ha kaba ka la pynpaw ka jingbym sngewhun halor ka jingthmu ka sorkar ban thied ïa ka jaka bad ban aiti pat sha ki karkhana bapher bapher.
U Bah Sadon u la kynnoh ruh kumjuh ba ka Meghalaya State Investment Promotion and Facilitation Act, 2024 ka la long pura pyrshah ïa ka Meghalaya Transfer of Land (Regulation) Act, 1971 bad ka kolshor haba ïadei bad ka khyndew ka shyiap bad ong, “Hynnin ngi la ïohi ba ka sorkar ka la wengnoh ïa ka section 34 jong kane ka MSIPF Act, ha kaba ka lamkhmat jong kane ka kyndon ka pule ba ka don ka bor kaba lah ban ïaid nalor kiwei pat ki aiñ ne Act ba kynthup ïa ki custom bad ka jingpyndonkam ïa ka rukom bat khyndew hangne hynrei kane kam shym la long kaba la biang naba ka jingthmu jong ka Investment Meghalaya Agency (IMA) hangne ka long ban thaw ïa ka Land Bank.”
“Katba kane ka jingmut ban buh ïa ka Land Bank ka dang don, kan sa don la ka jong ka jingpyrshah bad ka Meghalaya Land Transfer Act. Kumta ngi kwah ban phah ka khubor ba ka jingweng noh ïa ka section 34 ka long kaba la pdiang sngewbha hynrei kane ka jingmut ba kongsan jong ka ban thaw ne buh ïa ka Land Bank ka long kaba ma bha haba ïadei bad ka riti bad rukom bat khyndew ha kane ka jylla,” ong u Bah Blah.
Haba ïadei bad ka rai jong ka sorkar ban pynthikna ba kan dei ban don ka jingpan jingbit napoh ki district council, u President ka HNYF u la ong, “Phi ïohi ban wad ka jingpan jingbit kam dei eh ka kam. Ngi lah ban ïoh jingbit hynrei la kumno kumno kumba ngi ju leh ha ki snem ba mynshwa ha shwa kane ka aiñ, haba don ki nongwan pynlut ne investor, kiba kwah ban pynlut na ka bynta ka jingmyntoi ka jylla phi dei ban pyntip bad wad ka jingpan jingbit bad ka dei ban ïaid lyngba ka jingwad jingtip ka jingkhmih bniah, nangta halor ka sawdong sawkun, bad ka pollution clearance hynrei hangne kane ka jingmut jong ka Land Bank, shisien ba ka khyndew ne ka jaka ka la don bad ka sorkar, baroh kine ki rukom pynïaid kam kiba dei ban bud kin sa shah ktah.”
Shuh shuh u Bah Blah u la pyntip ba ka HNYF kan sa pynlong ïa ka jingïalang hapoh ka CEC ha u taïew ban wan ban shim ka rai halor kiwei pat ki jingïakhih lada ka sorkar kam sngap bad shah shkor ïa ki jingdawa jong ka seng.
