Nongpoh, Nailar 29: Ki rangïalehkai U-17 jong ka jylla Meghalaya bala mihkhmat da ka Mynken Christian Higher Secondary School kala pynkhreh ïalade ban mih naka jylla ban leit shibynta sha ka International Subroto Cup Football Tournament 2024 ka ban long ha nongbah Delhi.
Naka liang ki bor pynïaid jong ka skul Mynken Christian Higher Secondary School mynta ka sngi kila pynlong da ka prokram kaba kyrpang ban kitbok ïaki rangïalehkai ka skul ha shuwa ba kih mih naka jylla ban leit shim bynta sha katei ka lympung da ka jingkitbok ruh ba katei ka kynhun kan wanrah ka nam bad ka burom ïaka jylla bad ka skul hi baroh kawei.
Ha kane la sngi la donlang da u Principal jong ka Skul u Babu Everlasting Pyngrope, ki kynhun seng bhalang, ki khynnah skul, Nonghikai lem bad kiwei kiwei.
U Babu Everlasting Pyngrope kum u Principal u la pynpaw ïaka jingkmen ba ka skul Mynken Christian Hr. Sec. School ka la ïoh ban mihkhmat ïaka jylla sha ka lympung ïalehkai ball kaba heh kaba la tip kum ka International subroto Cup hakaba ki khynnah kin sa ioh ban ïa khun pyrshah ïa kiwei pat ki skul kiba nabar jong ka jylla.
U la pynpaw ruh ïaka jingkmen haba ioh sngew ba ka Nongjri Presbyterian Sec. School kala long kum ka lahduh ha kane ka juh ka lympung jong ki khynnah shynrang kiba hapoh ka 15 snem ka rta bad ngi don ïaka jingkyrmen ba ka skul Mynken ruh kan lah ban ïalehkai bha ha katei ka lympung bad ngi khmih lynti lyngba ki jingialehkai bha jong ki khynnah ngin sa lah ban wan rah sa kawei pat ka Trophy naka bynta ka jylla jong ngi.
