Khot u Inspector ka LD ïa ki Muster Roll ban pynshai ïa ki lad jingïarap

0

Nongstoiñ, Naiwieng 15: Kum shibynta ban pynsngewthuh ïa ki muster roll kiba trei ha ki tnad treikam jong ka sorkar, kum ha ki ophis bad shabar ki ophis, kum ha ki surok PWD bad kiwei kiwei, mynta ka sngi hat majai ka 15 tarik Naiwieng u bah M.Khar-buddon Inspector ka Labour Department West Khasi Hills, u la khot lang ïa ki 113 ngut ki muster roll kiba trei hapoh ka Nongstoiñ Division, ban pynshai ïa ki lad jingïarap kiba ka sorkar ka la mang kyrpang na ka bynta jong ki lyngba ka E.shram.
Ïa kate ka jingïalang la pynlong ha phyllaw jong ka ophis PWD ha kaba la pynïaid da u bah Shimbor Diengngan Executive Engineer PWD (PMGSY). Ha katei ka jingïalang u bah Kharbuddon u la pynshai ba baroh ki muster roll ne ki Misteri, ki nongbylla sngi kiba la register ïa ki kyrteng jong ki ha ka eshram, lyngba ka Labour Department bad kiba la don ïa ki Adhaar card bad Pan card, ki lah ban ïoh ïa ki jingïarap lada kin ngat ha kino kino ki jingmynsaw ne aksiden, ha ka por ba ki trei ïa ki jingtrei kiba dei ki skhim sorkar kum kaba trei bylla ïa ka skhim MNREGS bad kiwei kiwei.
Utei u heh sorkar u la pynshai ruh ba na ka bynta kito ki bym pat register, ki lah ban phah regsister lyngba ki Common Service Centre (CSC) kiba la ju tip kum ki Rainbow. Ki bym pat don card ki lah ban aplai ïa ki card jong ki lyngba kitei ki centre hynrei ki hap ban siew pat shispah tyngka kum ka bai kot sada bad ka bai print.
Ha kajuh ka por u la pynshai ruh ba ïa ki card ba ki la ïoh kim donkam satia ban pynthymmai kumba long kiwei ki card, hynrei shisien ba ki la ïoh kin neh kumto shi jingim.

Leave A Reply

Your email address will not be published.