Nongpoh, Jylliew 28 : Ha ka jingwan iuh kjat jong uwei na u heh nongïalam ka BJP mynta ka sngi ha Nongpoh kaba dei ka bynta kaba u la wan ban ïa kynduh naduh ki nongïalam niam, ki nongïalam ka party bad ki paidbah kaba long ruh shi bynta ka jingrakhe ïa ka jingdap 9 snem ka jingsynshar ka BJP ha ka ri India ba la ïalam da u Narendra Modi kum u Myntri Rangbah ka ri, ki nongïalam niam ka Balang Katholik mynta ka sngi ki la ioh ban pynsngew halor shibun ki jingeh ba la kynduh da ki Khristan ha ki bynta bapher bapher ka ri bad khamtam ki la buh ruh ka jingkyrpad ïa une u nongïalam ba ka sorkar India ba la synshar da ka BJP ka dei ban ai ka jingïada kaba kyrpang ïa ki Khristan.
Na ka liang une heh nongïalam ka BJP, u Dilip Kumar Jaiswal bad uba dei ruh u member ka Bihar Legislative Council haba wan ban iuh kjat mynta ka sngi ha Nongpoh, u la leit ruh ban ïa kynduh kyrpang ïa ki nongïalam niam ka Balang Katholik ha Nongpoh Parish bad kum ki nongïalam niam ki la ioh ruh ïa ka lad ban pynpaw halor ki jingeh ba ïa kynduh da ki Khristan hapoh ka ri India.
Ki nongïalam niam ka Balang Katholik jong ka Nongpoh Parish haba wan iuh kjat une uheh nongïalam ka BJP ki la pdiang sngewbha ruh ïa u da ka jingkmen ha kaba lyngba jong kane ka por ki la ioh lad ruh ban pynpaw ïa shibun ki jingeh ki Khristan khamtam ban pan ka jingïada kaba kyrpang na ka bynta ki khristan hapoh ka ri India.
Haba pynpaw halor ki jingeh jong ki Khristan hakhmat utei u heh nongïalam ka BJP ba un ïa kren sha ka sorkar BJP la don ryngkat naduh ki Phadar, ki sister, ki rangbah Balang bad ki Nongïalam niam jong ka Balang Katholik na ka Nongpoh Parish.
Kumba la pynpaw da ki nongïalam niam, ki mat ba hakhmat eh ba la pynpaw hakhmat une u heh nongïalam ka BJP ki dei ki jingshah leh bein ki Khristan, ka jingshah thang ki ingmane, ki skul ha kylleng ki bynta jong ka ri India bad na ka liang ki nongïalam niam ki la buh ka jingkypad sha une u nongïalam ka BJP ba un rah ïa ka khubor ban ïa kren ha ka sorkar BJP ba la lamkhmat da u Myntri Rangbah ka ri, u Narendra Modi ba kin ai kata ka jingïada kaba kypang ïa ki Khristan ha poh ka ri India.
Kum ki nongïalam niam ki la pynpaw ruh ba ka sorkar ka dei ban ai ka jingïada tang ïa ki Khristan hapoh ka ri India, hynrei kiwei kiwei ki jaid niam ruh khlem da jer kyrteng ba ki dei ban ioh ïa ka jingïada kaba kyrpag bad ruh ban ioh ïa kata ka jingmane Blei ba laitluid la ka dei ha kano kano ka jaid niam.
Na ka liang ki nongïalam ka Niam ka Nongpoh Parish hadien ka jingioh ban ïa phylliew jingmut bad une u nongïalam ka BJP, ki la phah ruh da ka jingthoh sha ka sorkar kmie ba kan thaw ruh ïa ka lad jingïarap na ka bynta ban tei ïa kawei ka kyndoh hapoh katei ka ïingmane ka Nongpoh parish kaba la aiti sha une u nongïalam ba un ïa kren sha ka sorkar kmie.
Shuh shuh, na ka liang u Dr. Dilip Kumar Jaiswal kum u heh nongïalam ka BJP u la pynpaw ka jingkmen ba la ioh ba ïa kynduh ïa kine ki nongïalam niam bad ha kajuh ka por u la kular ruh ba un ïa kren sha ka sorkar kmie ba la lamkhmat da ka BJP ba kan ïa kren kyrpang halor kine ki mad ba la pynpaw da ki nongïalam niam ba ki Khristan hapoh ka ri India ki dei ban ioh ïa ka jingïada kaba kyrpang.
