Khlem paw ka One Nation One Election Bill ha ki mat îakren ka Spl Session
Mynta yn kynriah dorbarnoh sha ka iing thymmai
New Delhi, Nailur 18: Ka Special Session ne ka Dorbar ba kyrpang jong ka Parliament ka ri India ka la dang mynta ka sngi, hynrei kawei na ki mat kiba la ïakren bha ha kine ki sngi, kata ka One Nation One Election Bill, kam shym la don satia ha ki thup jong ki Bill ban ïakren ha ka Dorbar ba san sngi.
Ka Dorbar ka la sdang da ka jingkren u Myntri Rangbah Duh, u Narendra Modi, uba la ïathuh ïa ka khana jong ka jingïaid lynti ka dorbar thawaiñ jong ka ri India ha kine ki 75 snem kiba la leit. Ha kane ka jingkren jong u, u Modi u la pynpynmaw ïa ka jingshakri ki Myntri Rangbah duh ba mynshuwa jong ka ri India, naduh ka por jong u Jawaharlal Nehru, u Lal Bhadur Shastri nangta sha u Atal Behari Vajpayee, u Dr. Manmohan Singh.
Ha kane ka Dorbar la pyntip ruh ba naduh lashai ka sngi, ka Dorbar kan long noh ha ka ïingdorbar ba thymmai kaba la la tei da ka sorkar NDA ha u snem 2020 haba u Modi u la plie ïa u mawnongrim. “Ka ladei ka por ban ngin ïaid noh shakhmat ban ban peit ïa kaba thymmai”, la ong u Modi haba pyntip nba naduh ka sngi ba ar ka jingïashong dorbar kan long noh ha ka ïingdorbar ba thymmai, kaba long kawei na ki Projek ban tei da ka sorkar pdeng lane kata ka Central Vista Project kaba la mang ban pynlut haduh 20,000 klur tyngka.
Ka Parliament thymmai la ong ba ka jinglut ka poi sha kumba 1200 Klut tam.
Ha kaba ïadei bad kane ka Dorbar ba kyrpang, ki Bill kiba la buh ban wanrah ki long ka Advocates (Amendment) Bill, 2023; the Press and Registration of Periodicals Bill, 2023; the Post Office Bill, 2023, Chief Election Commissioner and other Election Commissioners (Appointment, Conditions of Service and Term of Office) Bill, 2023, bad ka Bill halor ki riewtymmen bad lai tylli kiwei pat ki Bill kiba ïadei bad ki Scheduled Tribe bad Scheduled Caste.
Ha ka por ba pynbna ban pynlong ïa kane ka Special Session, ka la don ka jingantad ba kane ka dorbar ka sorkar pdeng ka lah ban wanrah ïa ka One Nation One Election Bill lane ka Bill ban pynlong elekshon lang ha kajuh ka por ïa ka Lok Sabha bad ïa baroh ki Assembly ha ki jylla ka ri India. Nangta ka la don ruh ka jingkhmih lynti ban wanrah ïa ka Constitution Amendment Bill ban pynkylla kyrteng ïa ka ri India sha ka Bharat bad kumjuh ruh ka Women’s Reservation Bill.