Shillong, K’lyngkot, 11: U Myntri Rangbah ka Jylla Conrad K Sangma ha ka sngi Balang, u la pyntip ba ki arngut ki khynnah rit kiba jah rngai ha ka jingpluh jong ka iing ha ka janmiet sngi Baar ha Mawbah, ki la khlad noh na kane ka sla pyrthei.
“U MLA u la ïakren bad ka Deputy Commissioner lem bad ïa nga. Na ka liang jong nga, ngan sa peit ïa ki jingdonkam katkum ki kyndon” ong u Myntri Rangbah ha ka jingïakren bad ki lad pathai khubor hadien ka jingïalang Kynhun Myntri.
U la ong ba ka dei ka jingjia kaba sngewsih namarba arngut ki khynnah rit ki la duhei ïa la ka jingim ha kamne ka jingjia bad ong ruh ba ka dei ka jingduh kaba khraw ïa ki bad khlem pep ka Sorkar kan sa ïarap kat kaba don ki lad ki lynti.
Ha kane ka jingjia, ka ding kaba la klang ka la pynkylla dpei ïa ki san tylli ki iing shongwai ba la long trai da ka Kong Ermon Nongkynrih ha ka shnong Mawbah bad na ka jingbthei jong ki tyndong lyer jingshet.
Baroh ki jingdon jingeh jong kine ki longing ki la shah bam duh lut ha ka jingklang jong ki thylliej ding ba rhem.
Ki Pulit ka tnat Fire and Emergency Service ki la hap ban wanrah haduh hynriew tylli ki Fire Brigade ban tem ïa ka jingklang jong ka ding.
