Shillong, Kyllalyngkot 11 : U bah Alan West Kharkongor u kyrtong ka seng NPP ryngkat bad ki dkhot jong ka NPP Sohra Block ki la leit ban ïakynduh ïa u Myntri Rangbah ka jylla u Conrad K Sangma ha ka 11 tarik u kyllalyngkot 2023 ha ïingsah jong u ban ai khublei kyrpang ha kaba ïadei bad ka jingpynbna ïaka thaiñ Sohra kum ka district kaba thymmai kaba ka Sohra ka long ka headquarter jong ka.
Ha kane ka sngi la ïadon lang u President jong ka NPP Sohra Block u bah Neston Swer ryngkat bad u General Secretry u bah Alexson Diengdoh bad kiwei kiwei ki riewdkhot jong ka party.
Ha ka 5 tarik mynta u bnai u Myntri Rangbah bad u Symbud Myntri Rangbah ki la hiar dalade sha Sohra ban leit pyn thikna da ka ba ai ïa kane ka khubor ba bha bad ba sngew tynnad sha ki paid bah ka thaiñ Sohra. Ha ka ne ka sngi la ïa don lang ki dkhot jong ka Sohra District Demand Forum bad katto katne ki Khlieh Nongsynshar ka hima Sohra.
Na ka liang kitei ki riewrangbah ki pynpaw ïaka jingkmen bad ka jingsngewhun kaba khraw halor ka jingpynbna bad ka jingpyntikna u myntri rangbah ba ka headquater jong kane ka district kaban mih thymmai ka long ka Sohra.
Kum ban shu pynkynmaw kawei na ki kyndon kiba u bah Alan West Kharkongor uba long mynta u kyrtong jong ka NPP na ka Sohra Constituency u la treh ban ïakhun na katei ka party ka long ba ka sorkar ka dei ban kyntiew kyrdan ïa ka Sohra Civil Sub Division sha ka District bad ruh ba ïaka ka headquater ka dei ban dei ha Sohra kaba dei kawei naki jingthrang bad jingangnud kaba ha khmat eh jongki paidbah ka thain Sohra.
Naka liang u bah Alan West Kharkongor u la ai khublei kyrpang ïa u myntri rangbah halor ka jingburom jong u ïa ka jingïakut bad kum ka jing sngewnguh u la kular ha khmat u myntri rangbah ban trei shitom ban ïoh ïa ka jingjop jong u bad jong ka party NPP na Sohra constituency.
