Khie ka thma Palestine bad Israel, sahkut ki nongleit Pilkrim na Meghalaya ha Bethlehem
Shillong, Risaw, 07: Ar phew hynñiew ngut ki nongshong shnong ka jylla Meghalaya kiba leit pilkrim sha Jerusalem ki la sahkut ha Bethlehem na ka daw ka jingïapynibor hapdeng ka ri Palestine bad ka ri Israel.
U Myntri Rangbah ka jylla Conrad K. Sangma ha ka rynsan X u la pyntip ba u la ïakren bad ki bor badei peit jong ka Ministry of External Affairs ba kin pynthikna ban ai ka jingïada ïa ki nong Meghalaya bad ba kin wan phai biang sha la iing da kaba suk ba saiñ.
“Nga la ïakren bad ka Ministry of External Affairs ban pynthikna ba kin ïoh jingïada ha lynti ban wan phai sha la iing. Nga la bthah ïa uMeghalaya Resident Commissioner ha New Delhi ban ai jingïarap sha ki nongleit pilkrim,” la ong u Sangma.
La ïathuh ba kine ki nongleit pilkrim ki don hapdeng ka Jingshngaiñ bad mynta ki don ha Indian Embassy ha Tel Aviv.
Ka jinglong jingman ha Middle East ka la nang sniew ha kine ki khyndiat taiew na ka daw ka jingïapynibor bad ka jingïakynad hapdeng ka Israel bad kaPalestine. La bthah ïa ki nongleit pilkrim ban shong hapoh ki jaka shah ban kiar na kaba leit shane shatai hynrei lait noh tang ha ki khep ba donkam kyrkieh eh.
Ka sorkar Meghalaya ka la peitngor bha ïa ka jingjia ha ka ri Israel bad kan ai jingïarap katba donkam na ka bynta ki nongleit pilkrim.
Jingpynbna ba donkam: Namar ka jinglong jingman ha ka ri Israel, ka Sorkar ka la pynmih ïa ka jingbthah da kaba kyrpad ïa baroh ki nong India kiba don ha Israel ba kin long kiba peitngor, bad ban wad ïa ki lad jingïada katkum ka jingbthah jong ki bor synshar. Sngewbha ban long kiba phikir, kiar ban ïaid haba ym donkam bad shong ha ki jaka kiba shngaiñ. Na ka bynta ki jingtip m sngewbha ban peit ïa ka Israeli Home Front Command website (https://www.oref.org.ilen ) lane ïa kino kino ki jingbthah ba la pynmih da ki jingthoh.
Lada don kino kino ki jingdonkam ba kyrkieh, sngewbha ban telephone sha ngi ha nombar +97235226748, lane shu phah kyrwoh ha ka email: cons1.telavivAmea.gov.in. Ki nongtrei ka Embassy kin sa ïarap ïa phi na ka bynta ki jingbthah kiba bniah.