Nongpoh, Nohprah, 05: Ki Pulit na ka jylla Arunachal Pradesh na Itanagar Police Station ha ka miet sngi Thohdieng ki la kem ïa u Bah Badhok Nongmalieh, uba dei ruh u Rangbah Shnong jong ka shnong Mawtnum hadien ba la pynmih hukum da ka Kashari jong ka Judicial Magistrate First Class ban kem hapoh ka kyndon bym ioh jamin.
Ka tyllong khubor ba la ioh lum na u Heh Pulit ka Ri Bhoi, la ong ba ka jingkem jong ki Pulit ka jylla Arunachal Pradesh ïa u Bah Badhok Nongmalieh ka dei ruh da ka jingiatrei lang ba ki Pulit ka Ri Bhoi.
ïa ka nongrim ba thikna halor ka jingkem ïa u Bah Nongmalieh ym pat lah ban pynpaw satia bad ka jingtohkit halor kane ka jingshah kem kan dang ïaid shakhmat ha ka jylla Arunachal Pradesh.
Kane ka jingioh kem ki Pulit ka Arunachal Pradesh ïa u Bah Badhok Nongmalieh ka dei hadien ka jingthwet kaba jur bad ruh ryngkat ka jingïatrei lang ki bor Pulit na Ri Bhoi District, ong ka tyllong khubor.
Kum ban pynkynmaw, u Bah Bad-hok Nongmalieh um dei satia tang u Rangbah Shnong jong ka shnong Mawtnum, hynrei u dei ruh uwei na u rangbah uba la ju iakhun teng ha ka elekshon MLA na Nongpoh bad na Jirang Constituency.
