Shillong, Nohprah, 05: U National General Secretary jong ka National Peoples Party (NPP) u Bah Sniawbhalang Dhar uba long ruh u Symbud Myntri Rangbah ka Jylla ha ka sngi Palei u la ïathuh ba u la pyrshang ban khroh ïa ki nongïalam jong kiwei pat ki seng saiñ pyrthei ban pynïasoh sha ka NPP.
U Bah Sniawbhalang Dhar ula pynpaw ïa kane, haba jubab ïa ka jingkyllli jong ki lad pathai khubor lada jia ba u nongïalam ka seng Congress u Bah Vincent H. Pala u la kyrpad ïa u, ban ïasoh biang sha ka seng Congress kaba u la don teng mynshwa.
“Nga ruh ngan khot lang ïa kiwei ki nongïalam ban pynïasoh sha ka party jong nga,” ong u Bah Dhar.
“Kaei kaba u Bah Pala u la leh, u shu trei tang na ka bynta ka party lajong. Nga ruh nga trei na ka bynta ka party laojng. Kam don eiei kaba bakla halor kata. Baroh ki kwah ban pynkhlaiñ la ka jong ka party. Kata kam don jingeh eiei,” ula bynrap.
Haba pynpaw ba ka NPP ka dei ka party kaba biang tam, u Bah Dhar u la ong ba kiwei kiwei ki seng saiñpyrthei kum ka Congress bad UDP kin ïoh hi kumjuh ba ka party jong ki ka dei kaba biang tam.
