Katkum ki kaiphod la mynjur ban tei u Mot Tirot Sing ba shi rynïeng: Sanbor Shullai

Shillong, Rymphang, 17: U Myntri barim ka tnat Arts and Culture u Bah Sanbor Shullai, uba long mynta u Chairman ka MTDC uba la sdang ïa ka jingpyrkhat ban pynïeng ïa u dur mot ba shi rynïeng jong u nongïaleh laitluid ki Khasi U Tirot Sing Syiem ha Dhaka, u la pynpaw ïa ka jingsngew lyngngoh ban ïohi ba ha ka jaka jong u Mot ba shi rynïeng la pynïeng da uba shiteng rynïeng ha ka sngi ba plie ha ka Sngi Thohdieng.
Ïa kane u la pynpaw sha ki lad pathai khubor hadien ba ladep jurip ïa ki artylli ki projek ba u la sdang hapoh ka Laban Constituency ha ka sngi Saitjaiñ da kaba kam ruh ba kam shym la don satia kano kano ka jingshah khot sngewbha ha kata ka rukom kaba dei.
“Nga ïoh ïa ka jingshah khot sngewbha ha ka minit kaba khatduh hadien ba nga la wanphai napoh ka Ïingdorbar Thaw Aiñ ha ka Sngi Thohdieng”, ong u Bah Shullai.
Ha kawei pat ka liang u la ong pat ba u sngewkmen ba ka jingleh burom ïa u nongïaleh laitluid ki Khasi la lah ban buh ha Dhaka bad kane ka long ka khyllipmat kaba sngew sarong ba ka bynta baroh ki nongshong shnong ka Jylla Meghalaya bad ïa u Myntri Rangbah ka jylla uba la pynpaw ruh ïa kane hapoh ka Ïingdorbar Thaw Aiñ haba ai jingkren ha ka sngi sdang jong ka dorbar mang tyngka ha ka Sngi Thohdieng.
U la ïathuh ruh ba ha ka por ba u dang bat ïa ka tnat Arts and Culture ka la don ka proceeding bad ki record ba la dep ïa mynjur ban pynïeng ïa u Mot jong u Tirot Sing Syiem u ba shi rynïeng hynrei u la ong ba ym lah pat ban tip balei ki la tei da uba shiteng rynïeng.