Tura, Rymphang 17: Ka Dorbar Mang Tyngka jong ka Garo Hills Autonomous District Council (GHADC) kan sdang ha ka taiew ban wan, ha kaba ki nongtrei jong ka Council ki la byrngem ban pynlong da ka jingsangeh treikam namar ka jing bym siew ïa ka tulop jong ki kaba la bun bnai.
Ki nongtrei hapoh ka lama jong ka Non-Gazetted Employees Association, ki la byrngem ban sangeh treikam naduh ka taiew ban wan hynrei kila pynjynsur noh ïa kane namar ba ka Council kan long ïa ka Dorbar Mang Tyngka ha ka sngi Nyngkong kaba long kaba kongsan bha na ka bynta ban bhah tyngka ïa ki tnad bapher bapher.
Kine ki nongtrei ki don ïa ka jingthmu ban ap haduh ban da kut ka Dorbar Mang Tyngka hashwa ba kin shim ïa kano kano ka sienjam ban pynlong ïa ka jingïakhih.
Kane ka jingthmu ban pynlong ïa ka jingïakhih kala pynmih ruh ïa ka thma ktien hapdeng ka Executive Committee (EC) kaba ïalam ïa ka GHADC da ka seng NPP bad ki nongïalam jong ka NGEA kiba kynnoh ba ki bor pynïaid jong ka Council kam shym la bat ïa la ka kular ban siew pyndep noh ïa ka tulop kaba sahteng.
“Ka Employee Association kam shym la wan ïakynduh ïa ngi ne ban ai ktien eiei ba kan pynlong ïa ka jingïakhih. Kam shym la don kano kano ka jingai jingtip ne jingai jingthoh ne ka jingthmu ban shong jingïalang ban ïakren halor kane ka mat. Ngi la ïoh jingtip ïa kajingthmu ka jongki lyngba ki tyllong khubor” ong u CEM ka GHADC u Albinush R Marak.
Kane ka jingpynsahteng ban siew ïaka tulop kala ïai bteng naduh ki snem kiba la leit bad mynta ka pisa ka ban siew kum ka tulop na ka bynta ki spah ngut ki nongtrei ka la nang bun shuh shuh.
Ki nongtrei ka GHADC kila mad jingeh halor ka jingbym ïoh ka jong ki ïa ka tulop la 32 bnai bad ka tulop kaba khatduh kaba kila ïoh ka dei ha u bnai Nohprah jong u snem bala dep kata hashwa ka jingrakhe ïaka Kristmas bad kila ïoh tang 2 bnai ka tulop.
Ki nongtrei kila dap da ka jingbynniaw bad kila kam ba na ka liang jong ka EC kala kular ban ai sa 2 bnai ka tulop ha u bnai Kyllalyngkot mynta u snem.
“Kam don jingmut ban ïakynduh ïa ka EC ban ïakren halor ka tulop namar ba kila dep ban ai ïa ka jingkular ban ai ïa ka tulop ha u Kyllalyngkot hynrei kila pynkheiñ noh ïa la ka jingkular” ong u Nongtrei uba la bitar.
Katba u CEM ka GHADC u Albinush Marak ula ong, ba kam long satia kumtei kumba la kynnoh.
“Ngi la ai beit ia ka jingkular, kata man ba ka sorkar jylla ka ai ïaka jingkyrshan bad ai ïa ka pisa, ngin pyllait noh ïa ka tulop. Mynta ka kynti ruh, ngi la khmih lynti ba ka sorkar jylla kan ai jingkyrshan khnang ba ngin lah ban ïarap ïa ki nongtrei, khamtam haba ki skul bad ki kolej kila plie ba ka dei ka por kaba ka pisa ka long kaba donkam bha” ong u CEM.
“Ngi don ïa ka jingthmu ban ïakynduh bad ban pynsngew ha u Myntri Rangbah ka jylla u Conrad K Sangma ynda u wan sha Tura, ïa kaba la khmih lynti mynta ka taiew” la pyntip u CEM bad ka ong, ba kan long kaba eh shibun ïa uno uno u briew ban siew pyndep lut ïaka tulop jong ki nongtrei kaba long kaba heh bha, mar ïa shimti ïa ka kam.
“Naduh ka por ba ka EC jong ngi kala shimti ban pynïaid ïa ka Council, ngi la dep ban siew pyndep lut ïa ka tulop kaba sah, ha ka jingshisha ngi la dep ban siew ruh ïa ka tulop kaba 34 bnai watla ka jingshimti ka jong ngi ka dang long ha ka por kaba lyngkot bha. Katei ka jingsiew pyndep ïaka tulop ka kynthup ruh ïaka tulop kaba sahteng naduh ka por jong u CEM uba nyngkong eh u Benedict Marak namar udei uba khlieh duh ïa kane kajuh ka EC,” ong u Albinush Marak.
“Ka pisa kaba sahteng ban siew kadei ka tulop kaba 30 bnai bad kadei kaba la pynsahteng da ki EC kiba rim jong ka GHADC. Ngi mynta ngin hap ban pynkhuid lut ha kaban siew lut ïa katei ka tulop” ong u Marak bad ka bynniaw artad.
