Shillong, Rymphang, 17: Uwei u Pulit Unarmed Branch Sub Inspector ka Ri Bhoi District u Amit Sinha u la khlad noh ha step sngi Saitjaiñ ha ka shnong Gurgoan, Delhi na ka jingïatakhuh kali.
U Amit Sinha uba dei u Officer In-charge jong ka Byrnihat Police Outpost, Ri Bhoi District u leit ïa ka kam ophis sha Haryana bad kane ka jingjia ba sngewsih ka la wan jia katba u dang leit ryngkat lang bad u paralok jong u, u Digvijay Singh.
Katkum ka ejahar ba la ujor da u Digvijay Singh u la ïathuh ba ki la mih ban leit bam jingbam ha Sector 58 Gurgaon bad katba ki dang wan phai da ka kali Mercedese kaba don ïa u number HR 25 DG 3865 ïa kaba la niah da u Digvijay Singh kynsan kynsan kawei ka kali ka bym lah ban ithuh ia u nombar ka la tynrah ïa ka kali kaba ki shong na ki bynta ba shadien kat haduh ba u Amit Sinha u la mynsaw jur.
Ïa u Amit Sinha la pynbna ba u la khladnoh da u Medical Officer ka Sanar International Hospital, Gurgaon bad u Digvijay Singh ruh u la mynsaw bad u la shah sumar ha kane hi ka Hospital.
Halor kane ka jingjia ba sngewsih, ki bor Pulit na Ri Bhoi tang mar ia ioh jingtip halor kane ka jingjia ki la phah mardor ia ki kynhun Pulit ban leit sha katei ka jaka ban tohkit kham bniah bad ruh ban iarap lem ia ka ing ka sem na ka bynta ban pynpoi ia ka met ba dangsah jong u sha la ïing na ka bynta ban leh burom khatduh.
