Nongpoh, Ïaïong 19: Uwei u rangbah u la duh noh syndon ïala ka jingim hadien ba u la ngam jyllop ha wah Umtrew, ha Ri-Bhoi District katba u dang leit jngi bad la ki paralok mynta ka step sngi u Blei.
Katkum ka jingtip bala ioh lum la ong ba katei ka jingjia kala jia haka por kumba 8:30 eiei mynstep ha kaba utei u samla bala tip kyrteng kum u Elias Kurbah na Mawiongrim, Shillong u la leit ban sum bad 2 ngut ki paralok ha katei ka wah, hynrei kynsan kynsan utei u samla u la ngam jyllop, watla ki paralok jong u kila pyrshang ban ïarap hynrei kim lah satia namar ka jingheh ka um.
Hadien katei ka jingjia la pyntip ruh sha ki pulit ka Umsning Police Station, ha kaba mar mar la pyntip ruh shaka kynhun Search and Rescue Team (SRT) na Shillong bad ka Fire and Emergency Services (F&ES) na Nongpoh ban wad bad sei ïa utei u samla bad dei hadien ka jingwanpoi kitei ki 2 kynhun jong ka tnad pulit la lah ban sei ïa ka met utei u samla na katei ka wah.
