Ba jrong kti leh kynshleiñ u runar ïa ki dkhot met ba kyntang ka heprit ha ka thaiñ West Khasi Hills

Nongstoiñ, Ïaiong 19: Uwei u tymmen briew ba la palat 50 snem ka karta ba uba dei na ka thain West Khasi Hills District, u la leh kynshleiñ bad jrong kti ïa ka heprit (ba la buhrieh kyrteng) kaba dang 11 snem ka karta na katei ka juh ka shnong.
Katkum ka jingïathuh jong u Kpa bad ka kmie ha u nongthoh khubor, la ong ba kane ka jingjia la jia naduh ka 9 tarik Rymphang 2026, ka sngi ha kaba ym shym la don briew ha ïing namar ki leit iew sha Umdohlun.
La ong ba ka jingjia ka jia ha ka por kumba 3 baje ei ei noh phai sngi, ha kaba utei u tymmen u ba dang dei ruh u Paieit jong katei ka heprit, u la khot ïa ka sha ïing ba u sah kaba don marjan.La ong ba ynda ka la leit, u la pyni phlim ha ka mobile phone bad katba dang ïa peit phlim, u la tare ïa ka met jong ka da ka kti ha ki bynta ba kyntang jong ka.
La ong ba katei ka heprit ka la khynñiuh baroh shirynieng bad ka la kyrpad ba un pyllait ba ka kwah ban leit shabar bad hadien ar sien lai sien ba ka kyrpad ba u sa pyllait ïa ka. Mar kumta hi mar mar ka la mareh ban phet bad leit noh sha ïing.
“Ïa kine baroh ki jingleh jong utei u runar, ka la ïathuh hi ha ka kmie ynda ka la wanphai na ka jingleit sha iew Umdohlun. Ka la ïathuh ruh ba utei u runar wat hadien ba ka la phet bad leit noh sha ba don ki para khynnah, u dang ïai pyrta bad ïai khot ïa ka ban leit biang bad u. Hynrei, ka la pyneh bad kam treh shuh ban leit”, kila ong.
U la ong ruh, “Halor kane ka jingjia, na ka liang ka kmie mar mar ka la leit ïalam noh sha ki Doctor ban phah jngoh kaei kaba lajia ïa ka khynnah. Na ka liang ki Doctor ruh mar mar ki la shim kam bad ai ka jingthoh sha ka kmie, ïa kaba na ka liang jong nga bad ka kmie ngim ithuh kaei kaba la thoh”.
“Ym tang katta, na ka liang ka ïing ka sem ngi la ïathuh bad pyntip sha ki Kñi ba kin ïa pynbeit, ha kaba na ka liang ki rangbah ruh ki la ong ban sa ïakren pynbeit.Hynrei, shi sngi ruh em ar sngi ruh em, shi taiew ruh em ar taiew ruh em. Ka jingnang pynslem ka la pyntyrha ïa ka ïing ka sem”.
“Mar ïa ïoh jingtip na ka liang ka meiduh ryngkat ka kmie bad ka ïing ka sem, ngi la leit ban ujor ejahar sha ki pulit ha ka 24 tarik Rymphang 2026, ha kaba na ka liang ki pulit ka Nongstoiñ ruh ki la shim kam bad register case kloi lan”, ïathuh u kpa.
U la ong ruh, “Hynrei, ka long kaba lyngngoh ba haduh kine ki sngi ruh, na ka liang ki pulit kim shym pat la kem satia ïa utei u runar u ba la nud ban leh khlemraiñ pyrshah ïa ka khun jong ngi, kaba long ka jingthom bor lane Molestation lane POCSO ruh”.
Shuh shuh u kpa u la ïathuh ruh ba ha kitei ki sngi ba dang shu jia katei ka jingjia, katei ka khynnah rit kam shym leit shuh sha skul.Ka shu tieng bad khynñiuh baroh shirynieng bad kam nud wat ban mih shabar na la ïing ruh.
“Ha kine ki sngi watla ka la leit sha skul bad ki para khynnah ryngkat ka jingai mynsiem na ïing.Hynrei ka tang shu ïohi ïa utei u runar, ka kyllon bad bunsien ka ïapler ruh namar ka jingtieng kaba la palat ïa utei u runar”, u la ong.
Na ka liang ka kmie u kpa lem bad ka ïing ka sem ki kyrpad ïa ki bor ba halor ba ki dei ban shimkhia lem ïa kane ka kam bad leh ei ei kham kloi, namar ka jingleh jong utei u runar ka la ktah ïa ka bor pyrkhat jong katei ka khynnah haduh kine ki sngi.