Kam u Bah Sniawbhalang ba kiew ka vote ka NPP ha Khasi-Jaiñtia ban ïa kiwei ki party

Shillong, Lber, 31: U nongïalam ka National People’s Party u Bah Sniawbhalang Dhar uba long ruh u Symbud Myntri Rangbah jong ka Jylla ha ka sngi Palei u la kam ba ka jingïoh vote jong ka NPP ka kham bun haba ïanujor bad kiwei kiwei ki seng saiñpyrthei ha rilum Khasi-Jaiñtia kaba pynpaw ba ki paidbah ki la pdiang ïa ka NPP ha kine ki ar jaka. “Ha,oid, ngi lah ban ïoh duna ki MLA hynrei ka jingïoh vote, ngi kham ïoh vote haba ïanujor bad kiwei kiwei ki seng saiñpyrthei. Ka jingïoh vote jong ngi ka long 27% tam katba ka UDP ka ïoh 25% tam,” ong u Bah Dhar ha ka jingïakren bad ki lad pathai khubor.
“Kane ka pynpaw shai ba ki paidbah jong ka rilum Khasi bad Jaiñtia ki la pdiang ïa ngi (NPP),” haba kynthoh ïa ka jingkynnoh jong ka Congress ba ki paidbah rilum Khasi bad Jaiñtia ki la kyntait ïa ka NPP hadien ba ka la jop tang 8 ngut ki MLA ha ka elekshon ba dang shu kut shen ha ka jylla.U Dhar shuh shuh u la ong ba ka party ka dang pynlong ïa ka post mortem ïa kane ka kam yn sa pyndep hapoh 3-4 bnai.
Haba kylli, une u nongïalam jong ka NPP u la ong ba ki don bun ki daw kiba pynlong ïa ka party ban ym jop bun ki Seat ha rilum Khasi. “Ha,oid, ki don khyndiat ki Seat kiba la shah ktah ha “u Prah” bad ha kiwei kiwei na ka daw ba ngim ïoh ïa ki kyrtong kiba biang,” u la ong.
Ha kajuh ka por, u Symbud Myntri Rangbah u la pynpaw ka jingsngew skhem ba ka NPP kan jop beit ïa ka elekshon ha Sohïong.“Ngan pynthikna ba u kyrtong jong ngi un jop ïa ka elekshon. Khlempep lada ngi jop sa kawei ka Seat kan kham bha shuh shuh ïa ngi,” u la ong.