Dawa ka CoRP na ka sorkar jylla ban nym pyntreikam ïa ka Roster System, ai jingkyrshan ïa u MLA ka Nongkrem

Nongpoh, Lber 31: Ka Confederation of Ri Bhoi People (CoRP) kum kawei na ka seng bhalang na Ri Bhoi District mynta ka sngi ka la mih shakhmat ban ai ka jingkyrshan kaba pura ïa u Bah Ardent Miller Basaiawmoit uba la ïakhun pyrshah ban pynbeit ïa ka jingbhah thungkam thungjam hapoh ka jylla lyngba ka Roster System jong ka Reservation Policy hapoh ka jylla Meghalaya.
Kum ban pynkynmaw, u MLA ka Nongkrem, u Bah Ardent Miller Basaiawmoit u la shim khia ban kren halor ka Roster System ba ka sorkar jylla ka thmu ban pyntreikam noh ha ka jylla ha ka liang ka bhah thungkam thungjam bad kane ka jingthmu jong u ban ïa kren halor kane ka mat kam shym la seisoh namar ym shym lai ioh lad ban kren ha ka Dorbar mang tyngka na ka jingbym ailad shuh u Shongknor ba ka por jong ka Dorbar mang tyngka ka la poi sha kaba kut.
Haba ïa kren bad ki Nongthoh Khubor mynta ka sngi ha Nongpoh, u Working President ka CoRP, u Bah Pateng Myrsing u la ong ba ka seng ka ai ka jingkyrshan kaba pura ïa u MLA ka Nongkrem, u ba la mih rangbah ban kren ïa kane ka mat ka jura ban ïa bha lang ym tang ki Khasi Jaintia bad kumjuh ruh wat ki Paid Garo, namar lada pyntreikam mynta ïa ka Roster system ka tara jur ka la noh shiliang dang ioh bhah bun ki Garo bad ïa ki Khasi-Jaintia kiba la bun ka jingbun paid ban ïa ki paid Garo.
U la ong ruh ba ka seng ka kren ïa kane ka bynta ym ban wan rah ka jingpyn ïapher jaid bynriew hapeng ki Khasi-Jaintia bad ki Garo, hynrei dei ban pynbit pynbiang shuwa ïa kane ka Roster System ba ka jingbhah kam kan dei ban long kumjuh la ka dei ïa ki Garo ne ki Khasi-Jaintia namar ngi shong ngi sah hapoh kawei ka jylla.
U la ban khia ruh ïa ka jingkren ki kynhun seng bhalang na Garo ba ki pryshah ïa u Bah Ardent Miller Basaiawmoit halor ka jingwan rah jongu ban ïa kren shaphang kane ka Roster Synstem ba ka sorkar jylla ka thmu ban pyntreikam, hynrei ki dei ban sngewthuh ba kumno kata ka bhah thungkam thungjam kan noh shiliang bad dei ban don ka bha kaba mar ïa kajuh khlem da noh tara jur la ka dei sha ki Khasi ne ki Garo.
“Ka seng kan pyrshah jur ïa ka sorkar lada ka pyntreikam ïa kane ka Roster system bad ka seng kan mih paidbah ruh ban kyrshan ïa u MLA ka VPP na Nongkrem bad shuwa ban pyntreikam ka sorkar ka dei ban pynbit pynbiang shuwa khnang ba ka bhah thungkam thungjam kan long kumjuh khlem da ïapher hapdeng ki Khasi bad ki Garo kaba dei ban shong katkum ka jingdon ki paid nongshong shnong” ong u Bah Myrsing.
Shuh shuh, u la bynrap ruh ba ka seng kam kwah ban mih kano kano ka huri hura na ka daw kane ka Roster system bad ka sorkar ka dei ban shim ïa ka jingkitkhlieh ban pynbit pynbiang noh bad lada ka sorkar kam patiaw bad kam shim ïa kane ka kami ap ka kam ki paidbah hapoh ka jylla kum ka seng ruh ka la long kaba kloi ban mih madan na ka bynta ban ai ka jingkyrshan kaba pura ïa u MLA ka VPP na Nongkrem.