Jowai, Lber 31: Ka Jaiñtia Student Movement (JSM) Jowai Circle mynta ka sngi ka la leit ban ïa kynduh ia u Deputy Commissioner ka West Jaiñtia Hills District uba long ruh u Chairman ka District Disaster Management Authority (DDMA) halor ka nongrim ba don shibun ki dieng bah (Kseh) bala kut rta kiba don harud Surok bad kiba don ha jan ïing briew ha kylleng ka sor Jowai.
La pynsngew lada jia ba jur u slap bad ka lyer kine ki dieng ki lad ban kheiñ ne kyllon kaba lah ban wanrah ïa ka jingsyier bad jingma ïa ki mynsien briew bad ki ïing ki sem ne kali ba ïaid ba ïeng, kumta ka Seng kala kyrpad jur ïa u DC ban shim khia halor kane ka kam ban bhah bad hukum ïa ka Forest Department ban leh ïa kaba don kam khnang ban lait na kino kino ki jingjia ba sngewsih ha kine ki bnai jur slap bad lyer ban sa wan.
Ka JSM ka la long ruh kaba kloi ban ïatrei lang ban pyni kino ki jaka ba buh jingma bad ban long Volunteer na ka bynta ban ïatreilang bad ka District Administration na ka bynta ka jingshngaiñ ka ïaid ka ïeng jong ki paidbah nongshong shnong ka Sor Jowai.
Ha ka jingkren bad ki nongïalam ka seng na ka liang jong u Deputy Commissioner ruh u la kloi ban shim khia ïa kane ka kam ban lait na kino kino ki jingjia ba sngewsih, pynkut ka kyrwoh na ka seng.
