Nongpoh, Lber 31: Kum shibynta ka jingrakhe ïaka Road Safety Week ha jylla bad ka ri baroh kawei, halor ka jingdonkam ban don ka jingkitkhlieh bad phikir haba ñiah kali ha surok bah, ka ophis jong u District Transport Officer, Ri-Bhoi District haka jingïatreilang bad ka ophis u Deputy Commissioner ka Ri-Bhoi District mynta ka sngi kila pynkut noh ïaka Road Safety Week bala sdang naduh ka 27 tarik mynta u bnai ha ophis u DTO, Nongpoh ban pynsngewthuh paidbah halor ka jingdonkam ban phikir bad adkar ïalade haka por ba ñiah kali ha surok bah ban lait na kino kino ki jingjia ba sngewsih.
Katei ka prokram ka dei ruh shibynta ban pynphriang ïa ka khubor halor ka jingdonkam ban long kiba phikir bad ruh ba kin bud thik ïa ki kyndon ha ka liang ka ñiah kali ha ki surok bah kaba dei ruh shibynta jong ka Road Safety Week bala wan ruh ban shim bynta da u Bah VR Ryngkhlem DTO ka Ri-Bhoi, Bah DSR Lakiang, Officer Incharge ka Nongpoh Police Station, Dr. N Kharnaïor, na Civil Hospital Nongpoh, D Shylla SDO, PWD Nongpoh, Dawa T Warjri, ki nongñiah kali kamai bad kiwei kiwei.
Haba kren ha katei ka sngi naka liang u VR Ryngkhlem DTO, Bah DSR Lakiang, Dr. N Kharnaior kila ong ba ka jingthmu kaba kongsan eh ba la pynlong ïa kane ka prokram ka long ban ai jinghikai bad ki jingbatai kiba bñiah halor ki rukom ñiah kali ka long ban pynsgewthuh paidbah halor ka jingdonkam ban long kiba phikir haba ñiah kali ban ïada na kino kino ki jingjia kiba aksiden hapoh u surok bah.
Ki la ong ruh baka jingñiah khlem akor ïaki kali bunsien kaba wanrah ruh ïaki jingjia ba sngewsih, ka jingduh ei ïa ki mynsiem briew, ka jingmynsaw kaba jur ïa ki paidbah bad kane ka ktah shikatdei eh ïa kiba bun tylli ki longing longsem kiba ju mad ïa kum kine ki jingjia kiba sngewsih, kiba jia ruh tang na ka daw ka jingñiah torti jong ki nongniah kali, la ong kitei ki ophisar.
Ha katei ka sngi la pynlong ruh ka prokram ai jinghikai ban batai shai sha ki nongniah kali, halor ka jingdonkam ban bud thik ïa ki kyndon niah kali, lyngba ki jingpynbna ba kim dei ban pyndonkam ïa ki mobile phone, ban nym dih kyiad ne kino kino ki kynja jingdih pynbuaid kiba dei ki dawbah jong ki jingjia aksiden, ka jingdonkam ban pyndonkam ïa u seatbelt, bad ruh ïa ki nongniah ia ki kali ar shaka ba ki dei ban pyndonkam ïa ki helmet ban ïada na kino kino ki jingmynsaw kiba jur.
