Kam ka Trinity International bym lah pynkhuid ïa ka Wah Lunar bad Kyrhuhkhla

Shillong, Naiwieng, 04: Ka kynhun kaba la shah pynkhamti ban wanrah biang ïa ka jingjyrngam jong ki wah kiba la kylla acid, kata, ka Wah Kyrhuhkhla bad ka Wah Lunar kynthup ruh ïa ka wahduid Mookympade da kaba pyntreikam ïa ka ‘Phyco-Remediation Technology’ ka la kdew ba ka jingbun shaba palat ki krem tih dewiong kam shym la seisoh satia.
Ïa kane ka jubab ba la ai da ka M/S Trinity International la pynsngew ha ka jingïalang kaba khatsaw jong ka Technical Committee ba thaw ha kaba ïadei bad ka jingpyntreikam ïa ka Meghalaya Environment Protection and Restoration Fund (MEPRF) kaba la long ha ka 4 tarik, Nailar, 2023, ba la pynïaid da u Principal Chief Conservator of Forest and HoFF, Meghalaya, ong ka kaiphod ba la aiti da u Justice (Retd) u BP Katakey sha ka Ingbishar Meghalaya High Court ha ka 22 tarik, Nailur, 2023.
“Ka Technical Committee ka la pdiang hadien ba la shong bishar ïa ka jingbatai jong ka M/S Trinity International halor ka jingbun shaba palat ki krem tih dewiong ha ki jaka ba la kdew kaba long ka daw bym shym la seisoh satia,” ka la ong.
Ha ka jingbatai, ka M/S Trinity International ka la pyntip, “ha kaba ïadei bad ka Kyrhuhkhla, ki don tang 57 tylli ki krem tih dewiong thliew khnai (krem tih dewiong/ krem tih dewiong ba la iehnoh) na ka K1 site sha ka K3 site hajan ka jingkieng Umsylih ha u snem 2021 kumba la kdew ha ka DPR ha u Risaw, 2021, hynrei kumba ka long mynta ki don palat 441 ki krem tih dewiong thliew khnai (krem dewiong-260 bad kiba krem ba la iehnoh-181). Kane ka jingai jingkheiñ ka long halor ka jingheh ka jaka kaba 1 sq km na ka jingïaid lynti jong ka Wah Kyrhuhkhla. Watla katta, ki don bun tylli ki krem dewiong lada ngi ringdur ïa ka lynti ïaid jong ka wah. Kane ka long ka mat kaba khia bha bad kaba la pynpaw la katto katne sien bad kaba lah ban ktah wat ïa ka jingtreikam jong ngi.”
Ka la ong, ba ka Trinity International ka la pyrshang ban pynkhuid ïa ka wah Lunar ha ka jingjrong kaba 11.30 kilomitar bad kumba 2.00 kilomitar antad na ki bynta ba sharud jong ka Wah. Ki padun ha shiltynter jong ka Wah ki long kiba noh padun khamtam ha ka por slap. Nalor kata, ha kine ki jaka ym don wat ka bording.
“Ngi la pynsngew sha ki bor synshar distrik bad ngi la ïakren bad ruh ba ka tnat Bording. Ka wah Lunar haduh ka bynta ba khatduh ba la pynkhuid ka dei kaba bun bha ka Acid ba la mih na ki krem tih dewiong,” la ong ka ka Trinity International bad ïathuh shuh shuh, “ha u snem 2021, ki don kumba 40 tylli ki krem tih dewiong kiba ka um jaboh ka tuid sha ka wah Lunar. Hynrei kumba ka long mynta, ka jingdon jong ki krem tih dewiong ka la kiew sha ka 200 tam. Nalor kata, ki don ruh ki bynta ba la tih mawshun bad tih shyiap ha kiba bun ki bynta jong ka Wah Lunar.”
Kumba la kyrpad, u Secretary jong ka tnat Mining and Geology ka Sorkar Jylla bad u Director jong ka tnat Mineral Resources, ka Sorkar Meghalaya watla ki la leit jngoh ïa kine ki wah ha ka 05/O9/2023 ban pynshisha ïa ka jingkam jong ka M/S Trinity International halor ka jingbun ki krem tih dewiong bad ki krem dewiong ba la ieh shrah, hynrei kim shym la lah satia ban pynlong ïa ka jingjurip na ka jingjur shaba palat jong u slap.
Ka kaiphod ka ong ba ka Committee ka la bthah ïa u Deputy Commissioner, East Jaiñtia Hills District ban pynlong ka jingjurip halor kane ka projek bad ban phah ïa ka kaiphod halor ka jingkam jong ka M/S Trinity International shaphang ka jingdon jong ki krem tih dewiong. La bthah ïa u Deputy Commissioner bad u Superintendent of Police, East Jaiñtia Hills District ban pynher ruh da ka Drone ha kane ka jaka khnang ban lap la ki dang don neem ka jingtih dewiong bad ban phah mardor ïa ka kaiphod halor ka jingpynlong ïa ka jingsorjamin da kaba pynher da ka Drone.
“U Deputy Commissioner lyngba ka kaiphod kaba 19/09/2023 u la pyntip sha u Secretary jong ka tnat Mining and Geology halor ka jingleit sorjamin bad ka jingsorjamin ba la pynher da ka drone ha kine ki jaka ba la pyntreikam ïa ka projek. La pyntip ruh ba ha ka jingjurip ym shym la lap satia ba dang don ka jingtih dewiong, hynrei ki don sa tang ki krem tih dewiong ba la iehshrah. Ïa ka kopi jong ka kaiphod la aiti ruh ha ka Committee. Ka Committee ka la tyrwa ban leit jngoh ïa ka projek hapoh khyndiat por,” ka la ong.
Katba, u Justine Katakey u la ai jingmut ha ka kaiphod ba u Deputy Commissioner bad u Superintendent of Police, East Jaiñtia Hills District kin pynthikna ba ki dei ban leit sorjamin manla ka por ïa kane ka thaiñ ha kaba ki don ki krem tih dewiong khnang ban pynthikna ba kan ym don shuh ka jingtih dewiong bad ka jingshalan ïa u dewiong.
“Ïa ka kaiphod kaba 07/10/2023, dei ban aiti da u Deputy Commissioner sha ka Committee,” u la ong.