Delhi, Naiwieng 04: Kumba ka aiom tlang kala wan biang, ka Meghalayan Age sa shisien pat kan pynlong biang ïaka Winter Tales haka sien kaba saw ha Nan Polok jong ka nongbah Shillong kaba dei ka tamasa ban khring bad ban plielad ïaki briew ba don sap naduh kiba shna jingshna, thain jingthain, ka put ka tem bad kumjuh ruh ka bam ka dih.
Ïaka jingpyntip paidbah ban pynlong biang ïa katei ka Winter Tales (Curtain Raiser) la pynlong ha ka dukan Meghalayan Age- The Store ha nongbah Delhi bala wan ban shim bynta lang da ka kong Ampareen Lyngdoh Myntri ka tnad ka rep ka riang kum ka kongsan haka jingdonlang ka kong Isawanda Laloo Secretary ka tnad Agriculture and Farmers Welfare Department bad kiwei kiwei ki riew rangbah.
Katei ka Winter Tales kan long lai sngi lynter naduh ka 14 haduh 16 tarik Nohprah, bad lyngba katei ka tamasa kan long ruh ka rynsan ïaki nongtem nongput, ki nongshna jingshna bad thain naka jylla bad kumjuh ruh ki jait jingbam bapher bapher.
Haba kren ha katei ka sngi naka liang ka kong Ampareen Lyngdoh kum ka kongsan kala pynpaw ka jingsngewkmen kaba khraw ban bteng biang ban pynlong ïaka Winter Tales ha ka jylla ban pyninam sha ka pyrthei halor ka jingriewspah ki kolshor tynrai, ki sap ki phong jong ki khun samla haka liang ka put ka tem ka rwai ka siaw, ka thain ka wet bad kumjuh ruh ki jingbam jingdih.
Ka la ong ruh ba ka jylla Meghalaya ka dei jylla kaba la kyrkhu da u Blei, bad ha kane ka jylla kaba rit lah ban ïohi ïaka spah mariang, ki briew kiba ïarap bad khamtam ki kolshor bad ki riti ki dustur bala buh naduh u mynbarim ki long kiba kyrpang, da kaba ïaroh ruh ïaka sorkar ba mynta kaba la lehbha bad ïarap ruh ïa shibun ki nongsengkam lajong ban ïeng hala ki jong ki kjat bad kum ka myntri kala ong ruh ba kam don jingbabe ba ka sorkar kan pynlut ha kum kine ki kam jingïarap.
Shuh shuh kala pynpaw ruh ka jingsngewkmen kaba khraw halor ka jingdon ka dukan Meghalayan Age ha nongbah Delhi bad lyngba katei ka dukan ki briew ka pyrthei ki lah ban ïohi ïaki sap ba ni jong ki paidbah ka jylla naduh ka thain jain, ki tiar shna kti bad kiwei kiwei.
Ha katei ka sngi naka liang ka kong Ampareen kala pynlait paidbah ruh ïaka Almanak 2024 bala ai kyrteng Meghalayan Scapes.
