Shillong, Naiwieng 04: Halor ki jingynnoh ba har rukom ha kaba ïadei bad ka jingpyntreikam ïa ka National Education Policy 2020, bad ïa ka jingthung ïa u nongwad buit hapoh ka skul bah North Estern Hill University (NEHU) u Prof. Prabha Shankar Shukla Vice Chancellor (VC) u la pynshai ba la leh ïa kitei baroh katkum ki rai bad ki kyndon kiba don ha ka aiñ jong ka NEHU Act 1973.
Kum ban shu pynkynmaw ka jingïa pyni bor hapdeng u Vice Chancellor (VC) ka skulbah NEHU bad ka Joint Action Committee (JAC) ba kynthup ka NHEUTA, NEHUNSA, NEHUSA ka la neh la bun sngi haba ïadei bad ka jingdawa ban weng kam ïa u Consultant (Nongwad buit) u Rohit Prasad bad ban pynurlong ïa bun tylli kiwei ki jingdawa kiba ktah ïaka bha ka miat ki samla pule bad ki nonghikai ka skulbah.
Watla ka JAC ka la ai por ïa u VC hapoh ka 13 tarik Naiwieng ban wengkam ïa u Consultant ka NEHU u Rohit Prasad hynrei naka liang u VC ula pynksan ba ym lah ban wengkam ïa u Rohit khlem kano kano ka daw.
Ki jingpynshai kiba kongsan kiba la pynshai da u Vice Chancellor ka NEHU ka long ba ïa ka jingpyntreikam ïa ka NEP 2020 naduh mynta u snem 2023-2024, ïa kane ka rai la shim ha ka jingïalang jong ka Academic Council kaba 104th ïa kaba la rai ban pyntreikam kumba ka long.
Ka skul bah ka la thung ïa u Prof. S M Sungoh, Coordinator, Implementation Committee for NEP 2020 ha kaba ïadei bad ka jingpyntrei kam ïa ka NEP 2020 ba lada don kino kino ki jingbym shai ki dei ban phah ïa ki jingthoh hapoh shibnai hynrei ym don ba phah kano kano ka jignthoh ban kynthoh ne ban ai jingmut ruh.
Haba ia dei bad ka jingthung ïa ki ophsiar ba kyrpang ka long ba la thung kontrak na ka bynta lai bnai bad la ju thung biang namar ka shong ka jinglah trei kam jong ki bad shuwa ban thung la khot ïa ki aplikoshon hynrei ym don ba thep kumta namar ka jingdonkam kyrkieh ka kam la thung kontrak noh ïa u ophsiar ba kyrpang.
Ka jingthung ïa u nongwad buit jong ka skul bah u Rohit Prasad ka jingsiew ka long beit T.75,040/- khlem don ka jingsiew ïa ka bai leit bai wan jongu bad ïa kane ka jingthung la ïoh ïa ka jingmynjur na ka Executive Council kaba la ai bor ïa u VC ban thung ïa nongwad buit.
Ka jingthung ïa u Prof. G Singhaiah kum u khlieh jong ka tnad pule SEMIS ka shong ha ka jinglong ba la trei slem ha ka kam ïa kaba la thung mynta la ar snem shiteng bad ka kyrteng jong u Prof. G Singhaiah kam shym paw hangno hangno ïa ka jingkynnoh pyndonkam bakla ïa ka pisa T.98.69 lak tyngka ha kino kino ki kot bad kam shym don ruh kano kano ka jingtohkit haba ïa dei bad kane.
Kaei kaba jia ka long ba ka kynhun tohkit ban peit bniah ïa kane ka jingkynnoh ka long halor ka jingpyndonkam tam kaba la kot sha ka T.98.69/- lak tyngka bad kane ka dei da ka CPWD ha kaba ïadei bad ka jingshna ïa ki ïing sah ha Tura Campus kaba katei ka don ka jingïapher kaba la ka jong ka jong.
Haba kren ha ki lad pathai khubor mynta ka sngi ha Shillong Press Club halor ki jingkynnoh la ong ba la leh ïa baroh ki kam katkum ki kyndon kiba don hapoh ka NEHU Act 1973 bad kaei kaba u leh la leh katkum ki kyndon ba pynïaid ïa ka skul bah.
