Kam dei kaba suk ban pynbiang tarajur haba ïadei bad ka kam tih dewïong da ka juk stad

Shillong, Jylliew 03 : U Myntri Rangbah ka Jylla, u Conrad K Sangma u la kubur ba ka dei ka kam kaba eh ban pynbiang tarajur ha kaba ïadei bad ka kam tih dewïong, khamtam ban tih da ka jingstad science ne ka scientific mining.
Haba kren mynta ka sngi Balang, u la ong ba ka Sorkar ka hap ban pynbiang tarajur bha ha kaba ïadei bad ka jingshngaiñ ki nongtih dewïong bad ban ym don ka jingktah ïa ka mariang, bad bynrap haba leh ïa ka kam ki don beit ki jingeh bad ym ju lah ban leh da kaba suk.
U la ong ba ka Sorkar Jylla ka ïatreilang bad baroh halor kane ka kam kumjuh bad ka Sorkar Indi. U la pynpaw ka jingkyrmen ba suki suki yn sa lah ban pynbiang tarajur lut ïa baroh lang. U la ong kumba long mynta ka Sorkar India ka ai jingbit ïa ka scientific mining tang ïa kiba don jaka ba heh haduh 100 Hectare.
U la ïa thuh ruh ba ki don 4 tylli ki jaka tih dewïong ba la ïoh jingbit, 3 tylli ki la sdang ïa ka jingtih dewïong bad shibun bah u dewïong la dep tih da ka scientific mining bad la shalan ruh shabar ka Jylla.
U Myntri Rangbah u la ong ba ka jingsngewkhia jong ka Sorkar ka long ïa ki nongtrei dewïong ba kham rit ki bym don ïa ka jaka kaba heh kumba la bthah, hynrei u la bynrap ba na ka bynta kane ruh ka Sorkar ka dang ïakren ban ïoh ïa ka jingbit na ka Sorkar India ba kiba don jaka ba kham rit ruh kin ïoh ïa ka jingmynjur ban tih dewïong.
Ha kaba ïadei bad ki par dewïong ba la shu ieh shrah bad lap ruh ïa ki met ïap, u Myntri Rangbah u la ong ba ka long kaba eh ban peit ïa kine ki par dewïong ba la shu ieh, namar tang ha kawei ka district ki don haduh kumba 21 hajar tylli.
Shuh shuh u ong ba lada khein lang ha ka Jylla baroh kawei kin don ym duna ïa ka 25 hajar tylli ki par dewïong kiba don la ka jong ka jong ki jaka. Kumta u ong ruh ba kam lah ban long ban lah leit peit lut ïa kita ki krem dewïong khamtam ba kita ki par dewïong kidei kiba la don palat spah snem.