Ka jylla Meghalaya ka la pyndep ïa ka jingïathep vote ha ka lah sngi U Blei bad kaba sah mynta ka long satang ka result ka ban pynbna ha ka 2 tarik u Lber ha kaba ka jingïañiew vote kan long ha katei ka sngi. Na ki phew lak ngut ki paidbah kiba la wan ban thep vote mynta ka sngi ym tip kaei ka rai kaba kin ai ha katei ka sngi.
Ka khubor kaba sngewtynnad na kane ka jingïathep vote mynta ka sngi ka long ba ka ka jingïajied ki paidbah ka la long kaba ïaid beit bad kam don kano kano ka jingjia ka ban ktah ïa ka elekshon ha ki 59 tylli ki Constituency ka kiba la pynlong ïa ka elekshon, namar ba ka Sohïong ym shym la lah ban pynlong na ka daw ka jingkhlad noh jong u kyrtong ka UDP, u Bah HDR Lyngdoh.
Katkum ki Exit Poll kaba la pynlong da kiba bun ki National News Channel, ka paw ba ka NPP kan long ka Party kaba jop bun eh ki MLA. Nangta ka bud sa ka Seng TMC bad bud sa kiwei pat ki Party kum ka UDP, BJP bad kiwei kiwei de ki Party. Lada kine ki Exit Poll ki long kiba dei kaba mut ba ka Meghalaya kan wan biang ha ka sorkar khleh khaw lang ne ka sorkar synrop. Ha kane ka sorkar baladep, baroh ki Party ki la ïasynrop lang ban thaw ïa ka sorkar Meghalaya Democratic Alliance, lait noh ka Congress. Tangba ka Congress ka la pait noh, ha kaba la mih ka TMC bad kham hadien ka Congress lei lei kam shym la don MLA shuh, na ka daw ba ki MLA jong ka nalor ba ki la phet bun sha ka TMC, ki la don ruh kiba phet sha ka NPP, UDP bad kiwei kiwei deki Party.
Kane ka jingpyni ne ka jingïoh ki Exit Poll, ka pyni ba ka seng NPP kaba la ïalam ïa ka sorkar ha kine ki san snem baladep, kala ïoh biang ïaka jingkyrshan ki paidbah. Ka jingpynpaw ki paidbah lyngba ki Social Media kam ïahap satia katkum ka jingthmu jong ki paidbah kiba leit ban thep vote. Kane kadei kaba ju jia ha ha man la ki elekshon. Ka jingpynpaw jingbitar ki paidbah ha ki Social Media ne ka jingthnum ha ki ïew ki hat ka shu kut tang ha ka jingthnum bad kam shym la long pat ban jied pyrshah ne ban pynkut noh ïa ki Party kiba ïalam ïa kane ka sorkar.
Ha kiba bun ki khep ki jingïakhih paidbah, ki jingpynpaw pyrshah ki paidbah kim ju poi pat sha ka jingpyrshah ïa ki Party ha ki por elekshon. Kane kadei ka jingeh kaba ka jylla Meghalaya ka ju ïakynduh na kawei ka elekshon sha kawei ka elekshon. Baroh san snem ki paidbah ki lah ban thnum ïa ka sorkar, hynrei ynda la poi ka elekshon pat ki jingthnum ki jingpyrshah sorkar ki shu jah noh tang ha ka por elekshon.
Hynrei wat lada ka result ne ka rai jong ki paidbah ka long kumno kumno ruh, ki paidbah ka jylla ki hap ban pdiang ïa rai jong uba bun ba lang lane kata ka majority kaba ki ong. Ka kam kaba hakhmat ka long ba ki Party kiban thaw ïa ka sorkar ka long ban peit ïa kiei kiba ka sorkar ba thymmai kadei ban leh. Lada dei ba ki Party kiba don ha kane ka sorkar ba thymmai kin dei ki juh kiba don ha ka sorkar barim kaba mut ki kam kiba la trei da ka sorkar MDA kin dang bteng. Hynrei lada jia ba wan da ki Party kiba thymmai ka mut ka lah ban don ki jingtreikam kiba thymmai.
Tangba ki Exit Poll ki sah hi ki Exit Poll, namar ki don ki khep kiba ki Exit Poll ki ïapher bun na ka result lane na ka rai jong u paidbah babun ba lang. Namarkata ka daw kat ba ym pat dep hi ka jingïañiew vote , hap ban ïa ap hi ïa ka rai jong u paidbah ha ka 2 tarik u Lber 2023.
