Ïoh rah ka Laitkyrhong ïa ka nam lahduh jong ka 3rd Mawkynrew Cup 2022-23

0

Shillong, Rymphang 27 : Ka Laitkyrhong ka la ïoh rah ïa ka nam lahduh jong ka lympung ïalehkai phutbol 3rd Mawkynrew Cup 2022-23 kawei na ki lympung ïalehkai kynjat bol ha heh tam ha ka thaiñ Mawkynrew ba la pynïaid da Mawkynrew Cup Committee (MCC).
Ka Laitkyrhong ka la ïoh rah ïa ka nam lahduh da kaba pynliem ïa ka Mawkynrew da 2-1 kol ha ka jingïalehkai phainal ha ka sngi Saitjaiñ ha madan phutbol shnong Umtong.
Haba phai sha ka jingïalehkai hapdeng kitei ki ar tylli ki team ban ïaknieh ïa ka nam lahduh ka la long kaba shongshit bha na ka jingwan sakhi ki paidbah jong katei ka dong ka thaiñ. Baroh ar ki kynhun ki la ïakhu tyngeh ban ïoh thep kol.
Hapdeng ka jingïakhun kaba ïakhaid bha, ka Mawkynrew ka la ïoh ban pynkhih jar nyngkong lyngba u Borlest Nongpluh ha ka jingïalehkai kaba la ïaid 17 minit bad lyngba katei ka shi kol ka la ai mynsiem ïa ka kynhun ban nang ïakhun tyngeh shuh shuh.
Ki rangïalehkai jong ka Laitkyrhong ruh khlem da duh mynsiem ki la ïapashat bol ha ka rukom kaba itynnad bha bad ñion sha ka kut jong ka Mawkynrew. Bad lyngba katei ka jingïalehkai ha ka minit ba 32, u Evereststarly Rynjah u la ïoh ban thep ïa ka kol pynïakhaid na ka bynta ka Laitkyrhong.
Hadien ka jingïathep ba mar shi kol ka jingïalehkai ka la nang shongshit ha baroh arliang ha kaba baroh ar ki kynhun ki la ñion shakhmat ban thew beit shapoh kol, hynrei haduh kaba kut jong ka kylla step baroh ar ki kynhun ki la leit sha la ki jaka khreh da kaba ïathep mar shi kol.
Haba wanphai sha ka jingïalehkai jong ka kylla miet, baroh ar ki kynhun ki la pynkylla ïa ki rukom ïalehkai. Watla ki la pyrshang ban thep kol hynrei bun tylli ki kabu ki la pynlehnoh ei noh. Dei ha ka minit ïalehkai kaba la ïaid 72 minit, ka la pynkmen ïa ka kynhun jong ka Laitkyrhong hadien ba u Evereststar Rynajah u la thep sa ïa ka shi kol bad ka kol kaba ar na ka bynta ka Laitkyrhong.
Da kaba tam da 2-1 kol, ka Laitkyrhong ka la nang ïakhun tyngeh bad khlem da ailad ïa ka kynhun ïalehkai pyrshah ban thep kol bad haduh kaba kut jong ka jingïalehkai ka la lah ban pynliem syndon da 2-1 kol bad khur ïa ka nam lahduh.
Ha kane kajuh ka sngi la ïoh ban pynïalehkai phainal hapdeng ki kynthei, ha kaba ka Syniasya ka la khur ïa ka nam lahduh da kaba pynliem da 3-2 lyngba ka tie-breaker ïa ka Kharang.
Ïa katei ka lympung ïalehkai phutbol kaba la sdang ha ka 27 tarik Nailar 2022 la wan ban pynhap pyrda noh da u Vibhor Agarwal (IAS), uba dei u Deputy Chief Secretary bad Director jong ka Sports & Youth Affairs jong ka sorkar Jylla kum u kongsan.
La ïadonlang ruh u Dikos Lymba, Bah Tyngkai Nongspung Sordar Raid Rngi, Bah Traibor Nongrum Sordar Umtong, ki riew rangbah bad ki dkhot jong ka Mawkynrew Cup Committee.
Ha kaba kut jong ka jingïalehkai la sam ruh ïa ki khusnam ba kynthup naduh ka khusnam lahduh ha kaba ka Laitkyrhong ka la ïoh khung ïa ka song pisa ba T.1.50 Lak ryngkat ka trophy, ka Mawkynrew kaba wan ba ar ka ïoh T. 80 hajar ryngkat ka trophy.
Ka Syniasya kaba jop lahduh ha ka liang ki kynthei ka ïoh khung ïa ka song pisa ba T. 30 hajar katba ka Kharang kaba wan ba ar ka ïoh T. 20 hajar.
La sam ruh ïa ki khusnam ha ka jingïaid March Past ha kaba ka Laitkyrhong ha ka liang ki shynrang kaba la jop kyrdan ba nyngkong bad ka Mawlai ha ka liang ki kynthei ki ïoh mar T. 10 hajar.

Leave A Reply

Your email address will not be published.