Mynta yn rai ki 21,40,453 ngut ki nongthep vote ïano ban jied napdeng ki 369 ngut ki kyrtong

0

Shillong, Rymphang 26 : Lashai ka sngi ka 27 tarik Rymphang 2023, ki 21,40,453 ngut ki nongthep vote ( lait noh ka Sohiong Constituency) kin rai ïano ban jied napdeng ki 369 ngut ki kyrtong ha ki 59 tylli ki Constituency ki ban leit mih khmat sha ka ïing Dorbar Thawaiñ ba 11 jongka jylla.
Ki nongpynïaid ïa ka election ki la mih lut ban ïapoi sha ki Polling Station naduh ka Sngi Saitjaiñ haduh mynta ka Sngi U Blei. Ka jingthep vote kan sdang naduh ka por 7 baje mynstep haduh ka por 4 baje janmiet.
Napdeng ki kyrtong ki ban ïakhun kiba pawkhmat ki long kum u Myntri Rangbah bad National President ka NPP u Conrad K Sangma u ban ïakhun na ka South Tura, u Lamphang ka ïing Dorbar Thawaiñ uba dei u President ka UDP u bah Metbah Lyngdoh ban ïakhun na ka UDP na ka Mairang Constituency, u Nongïalam ka Liang Pyrshah u Dr Mukul Sangma u ban ïakhun na ka TMC na Songsak bad Tikrikilla bad u MP ka Lok Sabha uba long u President ka MPCC u ma Vincent Pala u ban ïakhun na ka Sutnga- Saipung Constituency.
Na kitei ki 369 ngut ki kyrtong 36 ngut ki dei ki kythei. ïa ka Election na ka bynta ka Sohiong Constituency la hap ban pynsangeh noh na ka daw ka jingkhlad ba kyndit jong u kyrtong ka UDP u bah HDR Lyngdoh ha ka 20 tarik mynta u bnai. ïa ka tarik ban long ka election ha kane ka constituency yn sa pynbna da ka Election Commission kham hadien.
Haka jingshisha ki don 21,75,236 ngut ki nongthep vote ha ki 60 tylli ki constituency hynrei na ka daw ba pynsangeh noh ïa ka Sohiong mynta ki don 21,40,453 ngut ki nongthep vote na ka bynta ki 59 tylli ki constituency. Ki don haduh 3419 tylli ki Polling Station ha kine ki 59 tylli ki Constituency. Ki nongthep vote kynthei ki don 10,81,342 ngut bad ki shynrang 10,58,929 ngut.
Ki kyrtong ki long na ki 14 tylli ki seng saiñ pyrthei bad saw tylli ki dei ki National Party. Na ki National Party tang ka Congress bad BJP ba pynïakhun na baroh 60 seat.
U Chief Electoral Officer (CEO) ka jylla u bah F.R Kharkongor u la ïathuh ba la dep pynbit pynbiang lut nadong shadong na ka bynta banpynïaid beit pynïaid ryntih ïaka jingthep vote ha baroh ki 59 tylli ki constituency.
Nalor ki Pulit ka jylla,ki CRPF la wanrah ruh sa 119 pyrton ki Central Armed Police Force (CAPF) ban pahara ha ki Polling Station ban lait na kino kino ki jingkulmar.
Napdeng ki 60 tylli ki constituency ka Mawlai Constituency ka dei kaba heh tam namar ka don haduh 50,058 ngut ki nongthep vote kaba kynthup 23,114 ngut ki shynrang bad 26,914 ngut ki kynthei. Ka Dalu ka dei ka Constituency kaba rit tam kaba don tang 22,099 ngut ki nongthep vote ba kynthup ïa 10,982 ngut ki shynrang bad 11,117 ngut ki kynthei.

Leave A Reply

Your email address will not be published.