ïap hashen lai ngut ki Sister, u Brother bad u Father ba tynrah ka trok ïa ka Bolero ha Sumer

Nongpoh, Rymphang, 26: Ha kawei ka jingjia aksident ba shyrkhei, kawei ka Mahindra Bolero kaba don ïa u number AS 26 B 7908 ka la pra phum hadien ba kawei trok kit dewbilat kaba don ïa u number WB 41 G 7628 ka la jam na shilliang sha shilliang surok bad thom beit ïa ka Bolero sha kynroh dukan ha ka janmiet sngi U Blei. Ha kane ka jingjia 6 ngut ki mynsiem briew ki la khladnoh hashen katba ar ngut kiba dei u nongñiah bad nongbud trok ki la mynsaw jur.
U kyrwoh ba la phah da u Bishop jong ka Bongaigaon u Most Rev. Thomas Pulloppillil, la ïathuh ba ïa kine kiba khladnoh la ithuh kyrteng kum u Fr. Mathew Das uba long u Parish Priest jong ka Barama Parish. Lai ngut ki Sister ki dei na ka Fatima Convent ha Barama bad na Baganpra bad ka nonghikai jong ka St. John’s HS School, Barama. Ïa kine ki lai ngut la tip kyrteng kum ka Sr. Melagrine Dantes, Sr. Promila Tirkey bad Sr. Rossie Nongrum.
Katkum ka khubor ba la ïohlum la ïathuh ba kane ka la jia ha ka por kumba 2:30 nohphai sngi ha ka shnong Umbang Sumer, Ribhoi District katba ka Bolero Mission jong ka Jylla Niam Bongaigoan, Assam ka dang thmu ban kiew sha nongbah Shillong hynrei ynda poi ha ka jaka ba kham khongdong ha ka shnong Umbang kawei ka trok kaba kit dew bilat kaba dang wan na ki thaiñ Jowai kaba la pynher sted bha ka la jam beit sha shilliang surok bad tynrah beit ïa ka Bolero haduh ba kan da kylla khongpong ar ne lai sien bad kiew ruh ïa kawei ka kynroh bad ka trok ka la ban ruh syndon ïa ka Bolero shapoh jong ka.
Ha kane ka jingjia, 6 ngut ki mynsiem briew kiba shong ha ka kali Bolero bad kynthup ïa u nongñiah, lai ngut ki Sister, uwei u Father, uwei u Brother jong kawei ka skul Mission na ka jylla Assam ki la duh noh syndon ïa la ka jingim.
Ka la shimpor katto katne kynta ban sei ïa kine kiba la khlad napoh ka kali.
Na ka liang jong ki paidbah bad ki Pulit ki la ïarap ruh ban sei ïa ki met jong ki hynriew ngut na ka kali Bolero da kaba ot ïa ki nar da ki mashin namarba ka Bolero ka la dam syndah na ka jingshah ban katei ka trok bad shem jingeh ban sei ïa ki hynriew ngut bad pynkit noh sha Civil Hospital, Nongpoh.
Shuh shuh ïa u nongñiah jong ka trok bad ïa u nongbud kiba la mynsaw jur la pynkit noh sha jaka sumar sha nongbah Shillong ban ïoh ka jingsumar bapaka bad na ka liang jong ki Pulit ki dang pynlong ka jingtohkit halor kane ka jingjia.