Khlad noh u Polling Officer ba kylla ka kali ba kit ïa ki nongpynïaid election hajan Tikrikilla

Tura, Rymphang 26 : Uwei u Polling Officer uba dang mih bad ka kynhun pynïaid elekshon ha Ri-lum Garo, u la khlad noh namar ka kali (Mahindra Pick Up) kaba kit ïa ki nongpynïaid ïa ka jingïathep vote ha ka Jangrapara Polling Station ka la kylla kongpong noh hajan Tikrikilla, West Garo Hills hynnin ka miet.
Une u Ophisar ba dang 30 snem u kyrteng u Chesan Ch Marak ba na Chandmari, Tura, ba trei kum u Technical Assistant ka MGNREGA ha Gambegre Block, ula shah thung kum u Second Polling Officer ka Jangrapara Polling Station ha Tikrikilla.
Ula mih na Tura bad phra ngut ki kynhun pynïaid elekshon na Tura hynnin ka sngi kum shibynta jong ka kynhun ba nyngkong ba la thung ban pynïaid ïa ka elekshon.
Kane ka kynhun ka la leit da ka Mahindra Pickup haba u nongñiah, uba la pynher bha ïa ka kali, um shym la lah ban tehlakam ïa ka kali kaba lam sha ka jingkylla khongpong. Kane ka jingjia kala jia ha ka shnong Potamati.
U Nongñiah ula phet na kane ka jaka bad ieh ïa kane ka kynhun pynïaid elekshon hapdeng ka jingmynsaw kynthup u Chesan uba mynsaw na ki bynta jong ka khlieh.
Ka kynhun leit ai jingïarap ba kynthup ïa ki trai shnong kila kit noh ïa kine kiba mynsaw sha ka hospital ba marjan ba kin ïoh jingsumar kyrkieh bad ki doktor ki la lap ba une u Second Polling Officer u dei uba mynsaw jur tam.
Mar mar ïa une u Ophisar la kit noh sha Guwahati ban ïoh ïa ka jingsumar ba paka hynrei ula khlad noh na ka jingmysaw hynne ka step Sngi U Blei.
Arngut ki shipai BSF bad uwei u Pulit Home Guard kiba leit synran ïa kane ka kynhun ruh ki la mynsaw lang.
U Zonal Magistrate ula poi ha katei ka jaka ban shimti noh ïa ki EVM bad ki VVPAT bad ula hiar hi dalade sha Jangrapara Polling Station ha ryngkat ka kynhun bala buh ban bujli.