Mudui ka BJP ïa kiba pynphriang ïa ka shithi thok bym ïakhun elekshon shuh u Bah M. Kharkrang

By Mawphor News Desk On Feb 27, 2023

Shillong, Rymphang, 26: Ka Bharatiya Janata Party ha ka sngi U Blei ka la mudui da ka ejahar ha ki Pulit bad phah ruh da ka jingujor sha ka tnat pynïaid elekshon jong ka jylla halor ka jingshim kabu jong ki briew ban pynphriang ha Social Media ïa ka shithi ba shu thok ba u kyrtong ka BJP na North Shillong Constituency u Bah M. Kharkrang u la weng noh na ka jylli ïakhun ïa ka elekshon sha ka Iingdorbar Thawaiñ ka Jylla ka ban sa long ha ka Lah Sngi U Blei.
Katkum kane ka shithi thok ba la pynsaphriang ha ka Social Media la pynpaw ba u Bah M. Kharkrang u la phah da ka shithi sha u State President ka BJP u Bah Ernest Mawrie kaba ong ba u la weng noh na ka jingïakhun ïa ka elekshon na North Shillong Constituency.
Shuh shuh la pynthohbria ruh ha kane ka shithi da kaba kynnoh ba u Bah M. Kharkrang u la kyntu ïa ki nongkyrshan ki jong u ban khanglad ïa ka VPP ban jop ïa ka eleshon na North Shillong Constituency.
“Ka (shithi) dei kaba shu thok bad kane ka pyni ïa ka jingsyier thot thot jong ki party kiba ïakhun pyrshah kiba leh ym dei tangba ki syier ba ki la tip lypa ba kin rem bad kin rem khlem raiñ. Tangba kin ïoh shu ïoh bat noh khyndiat khynsoit noh ïa ita i vote jong ki ban ym rem khlemraiñ ki pynmih sa da kato. Kane ka dei ka jingleh pohdor jong kito party.”
“Ki klet noh ba ka North Shillong Constituency ka dei ka Constituency kaba ki briew ki dei kiba la nang la stad lut bad ki klet noh bad ki kheiñ ba ka North Shillong ka dei ka jaka kaba shi spah na ka shispah ka dei ka Constituency kaba ki briew ki dei kiba la nang la stad,” la ong u Bah Kharkrang haba ïakren bad ki lad pathai khubor ha ka janmiet sngi U Blei.
U la ïathuh ruh ba ka la don sa kawei ka jingpynphriang ïa ka jingthoh kaba lamler kaba ong ba ka jingwan jong u Myntri Rangbahduh ka ri u Narendra Modi sha Shillong ban ai jingkren ha Khyndai Lad kaba dang hap hapoh ka North Shillong Constituency kan ym pynjop satia ïa ka BJP hapoh ka North Shillong Constituency.
“Ki briew ki la sngew sammut ban ïohi haduh katto ba kiwei ki seng saiñpyrthei kin leh ïa kum kito ki buit poh jong ki,” la ong u Bah Kharkrang.
Haba pynksan ïa ka jingshah kynthoh ba ka jingwan jong u Modi ha Shillong kam pynmyntoi eiei ïa ka BJP, u Bah Kharkrang u la bynrap da kaba ong, “ka jingwan jong u Myntri Rangbahduh ka ri, ka la pynkhlaiñ shaba palat ïa ka BJP ha North Shillong namar baroh shikatta ngi kren shaphang ki song pynroi. Ha ka jingwan jong u Myntri Rangbahduh ka ri u la ai ka jingkular. Ka jingïapher kaba la ai jingkular da u Myntri Rangbahduh ka ri bad ka jingkular jong kiwei pat ki seng saiñpyrthei ka ïapher haduh katta katta namarba kano kano ka jingkular kaba la khlei hi da u Myntri Rangbahduh kam shu kut tang ha ka jingkular ba un ai ïa ka lawei baphyrnai sha ka jylla Meghalaya lada synshar ka BJP. Ki briew ki ngeit ïa kata bad u (Modi) la pynshisha ruh ïa kata ha kiwei kiwei ki jylla.”