Shillong, Rymphang 26 : Ka Election Commission of India (ECI) mynta ka Sngi U Blei ka la ai da ka show cause notice sha ka All India Trinamool Congress (AITC) namar ka khubor social media ba pynkheiñ ïa ka por ba jar jar ne ka ‘Silence Period’ ba 48 kynta hadien ba kut ka por ïalap elekshon.
Kane ka notice ba la ai da u Chief Electoral Officer (CEO) Bah FR Kharkongor sha u President ka Meghalaya Pradesh Trinamool Congress ka ong ba ka Party kala pynkheiñ ïa ka kyndon 126 (1) (b) jong ka Representation of People Act, 1951 da kaba buh ïa ka appeal ban vote ïa ka TMC ha ka Meghalaya Deserves Better Facebook page bad Instagram ha ka por 22:17 jong ka 25 tarik Rymphang lane por 10:17 baje mynmiet jong ka 25 tarik Rymphang.
Kane ka video ba la buh ka dei kaba la ai kyrteng “TMC is the only credible alternative”.
“Katba, ka kyndon 126 (2) jong ka Representation of People Act 1951 ka ong ba kino kino ki briew kiba pynkheiñ ïa ka kyndon sub section (1) kin shah pynshitom da ka jingset along kaba lah ban poi haduh 2 snem lane ka kuna, lane baroh artylli. Namar kata, la ailad ïa phi ban pynbeit noh kham kloi bad ban ai jingpynshai halor ka nongrim jong ka Party ban pynkheiñ ïa kane ka kyndon” ong u CEO.
U CEO ula bthah ïa ka AITC ba kan phah ïa ki jingpynshai hapoh ka por 5 baje jong ka 26 tarik Rymphang.
Ka Election Commission lyngba ka jingpynbna ba pynmih ha ka 18 tarik Kyllalyngkot kala buh ba ka por ïalap elekshon kala sdang naduh 7 baje mynstep haduh ka por 4 baje janmiet jong ka 25 tarik Rymphang bad ka 48 kynta kan sdang naduh ka por 4 baje janmiet jong ka 25 tarik Rymphang.
Ka kyndon 126 (1)(6) jong ka Representation of Peoples Act, 1951 kala khang ban pyni sha ki paidbah ïa kino kino ki kam ba ïadei bad ka elekshon la ka dei lyngba ki cinema, TV lane kino kino kiba ïasyriem ha ki Polling area hapdeng ka 48 kynta ba kut da ka kynta bala buh ban pynwai ïa ka jingïalap elekshon.
Nalor kane, ka kyndon sub Section (3) jong kajuh ka kyndon 126 ka batai ba ki kam elekshon ki mut ïa kino kino ki kam kiba thmu ban khring ne ba ktah ïa ka result jong ka elekshon.
