Shillong, Rymphang 26: Katba ka jingjied ïa ki MLA kiba thymi ka jylla ka la poi artad sha ka sngi kaba ki paidbah kin rai da kaba pyndonkam hok ïa ka hok lyngba ka shi vote la sakhi ruh ba ka jingleit phai ki jong ki nongthep vote ba sah na kawei ka shnong sha ka shnong kaba ki don ka vote ka la sdang naduh ka sngi Thohdieng bad sngi Saitjaiñ hynrei lah ban sakhi namar ka jingshah bat ki kali kamai na ki thaiñ nongkyndon kiba kamai sha sor bad kiwei pat ki thaiñ la ïohi ba ka don ka jingïaknieh kali kaba jur bha namar bym don kali kamai kumba ka ju don baroh shikatto.
Kane ka jingsyrtok na ka jingduna ki kali kamai ha ki thaiñ nongkyndong ka la sdang la jan artaiew eiei ïa ki paidbah kiba nabar ka sor Shillong, kiba kwah ban wan sha Shillong ban pyndep ïa ki kam ki jam ba lai phew jait kynthup ka jingwan shim dawai dashin bad kiwei kiwei.
Kane ka jingduna kali ha kine ki taiew kiba la dep ka dei namar kiba bun ki kali kamai kim treh wan kamai shuh shasor ïoh kin shah bat ha ka Tnad Election ban pyndonkam ïa ki ha ka kit ka rong ïa ki nongthep vote bad ki nongpynïaid elekshon.
Haba ïa kren bad ki nong ñiah kali ki ba ïoh lad ban kit ïa ki nongleit nongwan ki la ong ha ka por bym dei ka election ki hap ap ma ki ïa ki nongleit nongwan ban wan bad ki hap ap da ki kynta ruh teng teng kat haban dap hynrei ha kine ki sngi la ong ba kim don kam ban ap mar ïa poi ka kali ha stand la kiew hi ki briew da ka ba shu ïa knieh kat ba ïoh rung nyngkong.
Haba kylli ïa ka daw jong ka jingsalia jong ki ban leit sha ki duty elekshon ki la ïathuh ba ka daw ka dei namar ka dor kaba ka tnad ka siew kam ïahap satia bad ka bor kaba ki la pynlut.
“Pyrkhat maphi kin ai ka bai kali bad ka bainong jong ngi hadien bun bun bnai bad ka dor kaba kin siew ruh ka long kaba rit palat ym tang ba ki seiw rit hynrei ka jinghap bunkam ban pyndap ïa ki kot ki sla ka la nang pynsngew jlep ïa ngi dei na kata ka daw keiñ ngi kiar ka kamai sha sor,” la pynpaw ki katoo katne ngut ki nongñiah kali.
