Ka Women Reservation Bill kan wanrah ka jingkylla ha ka synshar khadar: P.T Sawkmie

0

Shillong, Nailur 20 : U Bah P.T.Sawkmie, MLA barim mynta ka sngi u la pynpaw ba ka Women’s Reservation Bill, kan wanrah ïa ka khuid ka suba bad ka jingkylla ha ka synshar ka khadar ha ka ri baroh kawei.
“ïa kane ka Women’s Reservation Bill sahkynmaw ba la wanrah da u myntri rangbah ka ri ha ka Sngi Ba Ar ha Dorbar Parliament, shimet nga pdiang sngewbha ïa kane ka bill na ka bynta ka jingmyntoi jong ki kynthei ha ka ri,” ong u bah Sawkmie haba kren sha u nongthoh khubor.
U la bynrap, “Ki longkmie ha ka ri bad ha ka jylla kin ïoh ïa ki kabu ban don bynta ban thaw ïa ki policy ban saiñ dur ïa ki kam pynroi ha ka ri.”
U pynpaw ba ki kynthei ki la dep pyni ïa ka jinglah jong ki ha kiba bun ki bynta jong ki kam pynroi bad ban leh hok ïa ki kam baroh.
“Ngi khmih lynti ba kan don ka jingkylla kaba khraw ha ka ri, ha ka khyllipmat ba ki longkmie ki rung sha ka sorkar jylla bad sha ka sorkar pdeng. Shuh shuh ka bamsap kan duna bha bad ka lah ban lait syndon,” ong shuh shuh u bah Sawkmie.
U la pynpaw ruh ba hashuwa kane bun ki kynthei kiba kwah ban long MLA, MP, hynrei kim ïoh lad satia, hynrei lyngba kane ka Bill ka kabu ka la plié ïa ki.

Leave A Reply

Your email address will not be published.