Ka Veterinary kan pynlong ka jingkhmih bniah ïa ki sniang: SSSS

Mawkyrwat, Jylliew 28: Ka Synjuk Ki Seng Samla Shnong, South West Khasi Hills District, da ka jingsngewkhia bad jingkitkhlieh halor ka jingeh bad ka jingduh-nong, kaba ki nongri sniang ha ka South West Khasi Hills District ki la mad namar ka jingpur jong ka jingpang African Swine Fever (ASF) bad halor kane ka bynta ki la aiti da ka jingthoh sha ka ophis treikam jong ka District Animal Husbandry & Veterinary Officer, South West Khasi Hills District.
Ha ka shithi, ka Synjuk Ki Seng Samla Shnong, South West Khasi Hills District ki la pynpaw ba ka kam ri sniang ka dei kawei na ki kam kiba ai jingïohkam bad jingïohnong ïa kiba bun ki longïing ha ka South West Khasi Hills District.Hynrei, ka jingwan jong kane ka khlam African Swine Fever (ASF) ka la wanrah ka jingduhnong kaba khraw ïa ki nongri sniang.
Ym tangkata, ka Synjuk ka la buh ruh hakhmat jong ka ophis ïa ki mat kiba kongsan ba na ka liang ka ophis ba dei peit ïa ki jingri jingdup kan shim jingkitkhlieh ba kynthup ïa ka jingkyrpad ban pynbiang ïa ki dawai shin bad kiwei ki dawai kiba donkam ban ïarap ïa ki sniang kiba pang, namar ba bun ki nongri sniang ki khlem ïoh dawai haba ki leit wad na ka ophis.
Nalor kata, ka Synjuk ka la kyrpad ïa ka ophis ban pynkhlaiñ ïa ka jingpynsngewthuh paidbah kum ki awareness program ne jingpynshai lyngba ki lad pathai khubor, khnang ba ki paidbah bad ki nongri sniang kin tip ïa ki lad jingïada bad jingïakhun pyrshah ïa ka jingsaphriang jong kane ka jingpang.
Shuh shuh kawei pat ka mat ka long halor ka jinghiar ka dor jong ki sniang ba ri hapoh ka jylla hadien ka jingwan shalan sniang na shabar, katba ka dor jong ka doh sniang ha ïew ha hat pat ka dang neh kumjuh. Kumta ka Synjuk ka la kyrpad ïa ka ophis ban tuklar lem ban ïada ïa ka jingïoh-nong jong ki nongri sniang. Ka Synjuk ka la kyntu ïa ka tnad Veterinary ban pynlong ka jingkhmih bniah ïa ki sniang shwa ban shah ot ha ki ïew bad ki hat, khnang ban pynthikna ba kim dei ki sniang kiba pang bad ban tehlakam ïa ka jingsaphriang jong ka khlam.
Ka Synjuk ka la pynpaw ruh ba namar ba kane ka khlam ka la neh la jan ar bnai, bad bun ki nongri sniang ki la mad ïa ka jingduhnong kaba khraw. Kumta, ka kyrpad ïa ka ophis ban wad lad lyngba ki scheme jingïarap lane jingïoh jingïarap na ka Sorkar, bad lada kam don bor ban leh hi tang napoh ka district, ka dei ban ban pynsngew ruh wat sha ki bor ba halor.
Khatduh eh, ka Synjuk ka la kyrpad ba ha ki por ban sam sniang khun lyngba ki scheme jong ka Sorkar, ka ophis kan shim noh da ki sniang local kiba ri hapoh South West Khasi Hills District, ym ban wanrah na shabar ka jylla khnang ba ki nongri sniang hapoh jong ka district kin nang ïoh mynsiem ban pyntyllun ïa ka kam ri sniang.
Ka Synjuk ka la kyrpad ruh ban pynsangeh shipor ïa ka jingwan shalan sniang na shabar ka jylla, namar ki paidbah ki don ka jingsuba ba kane ka long kawei na ki daw ba pynpoi ïa ka khlam African Swine Fever (ASF) sha ka South West Khasi Hills District.
Namarkata, lyngba kane ka jingleit pynsngew ka Synjuk ka pynpaw ïa ka jingkyrmen ba ka District AH & Veterinary Office kan shimkhia ïa kane bad kan leh ïa kaba donkam ban jingïarap ïa ki nongri sniang kiba la shah ktah ha kane ka khlam African Swine Fever (ASF).