Nongpoh, Jylliew 19: Ka Umsning Block Headman Forum, kaba kdup lang ïa baroh ki Rangbah Shnong jong ki shnong kiba hap hapoh ka Umsning Block bad kaba la seng naduh u snem 2021, ka la pynlong ïa ka jingïalang ban jied ïa ki nongkitkam bathymmai jong ka na ka bynta ka samoi treikam 2026 haduh 2029.
Ha kane ka jingïalang, la pynskhem ïa ka jingthmu jong ka Forum ban bteng ban peit bad khmih ïa ki kam ha ka imlang ka sahlang kiba dang sahteng ha kane ka thaiñ, ban buddien ïa ki kam pynroi jong ka sorkar, bad ban pynsngew sha ki bor ba dei peit ïa ki jingdonkam jong ki shnong ha baroh ki liang khamtam eh hakaba ïa dei bad ka roi ka par ha ka imlang sahlang.
Ka Forum ka la kren shai ruh ba kan ym don jingïadei lane pyrshah ïa kino kino ki seng saiñ hima-sima ne seng saiñ pyrthei. Ka jingthmu ba hakhmat eh ka long tang ban shakri ban wan rah ïa ka jingmyntoi bad ka bha ka miat jong ki paidbah kiba shong ba sah hapoh ka Umsning Block.
Ki nongkitkam ba la shah jied ki kynthup ïa u Bah Frankie Nongrum, Rangbah Shnong Umsaitsning Lad Mawrong, kum u President. Ki Vice President ki long u Bah E. Nongbet, Rangbah Shnong 9 Mer, bad u Bah Tonsing Marbaniang, Rangbah Shnong Mawpyrhut.
La jied ruh ïa u Bah Banshan Nongbet, Rangbah Shnong Mawlyngkhung, kum u General Secretary, katba u Bah Raymond Sawkmie, Rangbah Shnong Umiarong, un shimti kum u Assistant Secretary jong ka Forum.
Ki Adviser ba la mynjur da ka jingïalang ki long u Bah Marchal Nongshli, Rangbah Shnong Nongthymmai, u Bah K. Warjri, Rangbah Shnong Umsning Patarim, bad u Bah Spalton Laloo, Rangbah Shnong Langsaw. Shuh shuh, la jied ruh ïa 20 ngut ki Executive Member kiba dei ki Rangbah Shnong na kylleng ki shnong ki ba hap hapoh ka Umsning Block.
Ha ka kyrwoh ba la pyllait paidbah da u General Secretary, u Bah Banshan Nongbet, la ong ba ka Forum kan trei shitom bad ïatreilang bad baroh ki Rangbah Shnong ban kyntiew ïa ka roi ka par jong ka Umsning Block bad ban pynurlong ïa ki jingangnud jong ki paidbah ha ka rukom kaba khuid ba suba kaba yn nym don kano kano ka jingshah ktah.
