Shillong, Jylliew 19: Ka seng Union of Cook Cum Helpers (UCCH) PM Poshan Meghalaya ha ka sngi Thohdieng ka la phah ïa ka jingthoh sha ka sorkar pdeng ban pynkynmaw ïa ka jingdawa jong ki ban pynkiew ïa ka bai trei shet ja sngi ha ki skul ban pynkiew ïa ka bai bylla na ka T.900/- sha ka T.9000/- tyngka shibnai kaba dei ka bhah jong ka sorkar pdeng.
Haba kren ha ki lad pathai khubor ha Shillong Press Club ka Kong Gina Nengnong ka la ong ba ka jingsiew jong ka sorkar pdeng ïa kane ka bhah kaba T.900/- tyngka ka la neh mynta la jan arphew snem, na ka jingkiew dor kat ka jingïaid ka por ki la dawa ba ka sorkar pdeng kan pynkiew noh ïa ka bai trei sha ka T.9000/- tyngka shibnai.
Ha ka juh ka por ka la ong ba lada ka sorkar pdeng kam lah ban pynkiew kan bha ba ka dei ka pynduh noh ïa kane ka skhim PM Poshan ha Meghalaya, namar ka la eh ïa ki ban trei T.900/- tyngka shibnai nalor ba ki ïoh tang shiphew bnai ha ka shisnem.
Ka seng ka ai khublei ïa u Myntri Rangbah ka jylla u u ba la pyniew ïa ka bhah jong ka sorkar jylla na ka T.100/- tyngka sha ka T.1100/- tyngka kumta ka seng ka pynpaw ïa ka jingsngewnguh ïa u Myntri Rangbah ka jylla ha kaba ïadei bad kane ka bynta bad ka kam.
Na ka liang ka seng ka la thoh sha ka sorkar pdeng naduh u snem 2022 bad haduh mynta ka sorkar pdeng ka sngap jar jar bad ha kane ka jingwan ka Myntri Pla Tyngka sha Meghalaya ka seng ka pynsngew sha ka Myntri ïa kane ka jingdawa kaba long kaba kongsan bha na ka bynta jong ki.
