Ka suk ban kynthoh ia kiwei hynrei wat klet ba phi la long teng u MLA Sohra bad kaei phi la leh !

Shillong, Rymphang 03 : U Bah Gavin M Mylliem, kyrtong ka People’s Democratic Front (PDF) sha ka elekshon MLA 2023 na Sohra Constituency ka ban long ha ka 27 tarik u Rymphang, 2023, u la ong ba u Bah Titos W Chyne, kyrtong ka United Democratic Party (UDP), um dei ban klet ba u la mih khmat ïa ka Sohra kum u MLA naduh u snem 2013 haduh u snem 2018 katba mynta pat u pyrshang ban ïalam bakla ïa u paidbah.
Kane ka jingkynthoh u Bah Gavin, uba la jop ïa ka elekshon MLA 2018 na ka PDF bad uba dang pynkhreh ban shah jied biang mynta u snem 2023, ka la long haba ïakren bad ki lad pathai khubor hadien ka jingwan thep kyrteng ha ka 03 tarik u Rymphang, 2023 ha ophis treikam ka Sohra Civil Sub-Division ha kaba la wan ban kyrshan da ki nongkyrshan jong u bad ka PDF hi na kylleng ki shnong katei ka Constituency.
Haba jubab ïa ka jingkynnoh u Bah Titos ba u MLA u khlem pyndep ïa ki kular halor ka karkhana pynmih dewbilat ka Mawmluh Cherra Cement Limited (MCCL), u Bah Gavin u la ong, “Ngam kwah ban kular eiei hynrei ka don ha nga ka thong ban kyntiew ïa ka Constituency ha ki bynta bapher bapher bad ki paidbah ka Sohra Constituency ki khot ïano da u ‘Bah Kular’ ? Ngam ju kham kular ha kino kino rynsan paidbah bad kiwei kiwei”.
U la ong ba ïa ka MCCL la seng naduh u snem 1966 bad ka la ïaid beit ryntih hynrei dei tad ha u snem 2007 ba ka Sorkar Jylla ka la shim ïa ka rai ban pynkylla noh ia ka Wet Process Plant sha ka Dry Process Plant ryngkat ka jingbuh thong ban pyndep hapoh ka shi snem shiteng. “Hynrei la pyndep ïa ka Dry Process Plant haduh u snem 2016 bad ki tiar ki tar ki la shu sarang hapdeng kitei ki snem”, u la ong.
“Ynda la pynïaid ïa kane ka Plant kaba thymmai la buh thong ban pynmih 600 MT shi sngi bad 18000 MT shi bnai hynrei ym shym la lah ban leh kumta bad ym shym la lah ban poi ha ka bynta ban nym duhnong ne ïohnong”, u la ong da kaba bynrap ba la buh ban pynmih 10,500 MT shi bnai hynrei khlem lah ban pynmih wat tang ïa ka tulop ki nongtrei ha kitei ki snem ba la dep watla ka Sorkar ka la buh 300 haduh 400 klur ban pynbiang ïa ka karkhana.
“Ka Plant kam shym la treikam ban pynim dalade ïalade”, u la ong da kaba pyntip ba ma u hi bad u Bah Balajiedkupar Synrem, MLA ka Shella ki la ïakren bad u Myntri Rangbah ka Jylla, u Conrad K Sangma halor ka jingeh ki nongtrei ka MCCL. “Hynrei kum ki nongmihkhmat ngi sngewthuh ba ka Sorkar kan bei sa 200 klur ha kane ka Plant ban pynim ïa ka hi kan long kaba eh”, u la ong da kaba bynrap ba ïa ka bit ka biang ki nongtrei haduh mynta ki dang pynneh beit lyngba ki jingïarap pisa na ka Sorkar.
U la ong ba ka long kaba eh ban pynthikna la ka MCCL ka lah ne em ban pynim dalade ïalade lada pynlut pisa sa 200 klur tyngka. Halor ka jingthmu ka Sorkar ban pynrung Joint Venture ha ka MCCL bad ka bit ka biang ki nongtrei, u la ong, “Na ka liang ka Sorkar ka ai ki jingïarap pisa man la ka por sha ki nongtrei bad na ka liang jong ngi ruh ngi la pynsngew bad hap wad lad na ka bynta ka jingbiang jingbit ki nongtrei bad ki ruh kin hap long kiba ïaishah”, u la ong.
Halor ka jingkynnoh u Bah Titos ba ka Sohra ka don tang ka ïew bad ka State Bank of India, u la ong, “Ha shwa u snem 2018 ka la don shisha tang ka SBI bad ka ïew kaba i sangsot bad ki basa kiba shu tap tnum da ki tin. Hynrei ha kane ka samoi jong nga kum u MLA la ïoh ïa ka building kaba paka na ka bynta ki nongshong ïew”.
U la ong ba watla ka Sohra Government College bad ka Sohra CHC kim hap shuh ha Sohra Constituency hynrei kum ki nongmihkhmat kim dei ban shu peit ïa ka roi ka par tang ha ka Constituency. “Ha ki snem kiba la dep, ma nga bad u MLA ka Shella, ngi la ïatreilang na ka bynta ki mat ïakren kiba ïa dei bad ki paidbah”, u la ong bad pynpaw ba ka building ïa ka Sohra Government College la ïoh mang tyngka bad ka kam ka la ïaid sha khmat.
Da kaba ïathuh ba u la pynsngew sha ka Sorkar halor ka jingdonkam ïa ka Science bad Commerce Stream ha Sohra College, u la ong, “Ka Sorkar ka la dep mynjur ba tang shu dep ka building ba thymmai yn sa pyrkhat ban ai noh ïa kine ki tnad jingpule”.
Halor ka CHC pat, u la ong ba ki la pyrshang ban pynjanai hynrei ki jingduna ki dang bun bad khmih lynti ban don ka jingïatreilang ban kyntiew ïa ka sha khmat. Halor ka jingkynnoh ba ka Laitlyngkot CHC kam urlong namar ka jingbym bud-dien u MLA, u Bah Gavin u la ong, “Kum ha kane ka por ba la dei ka por ban pynthymmai ïa ki nongmihkhmat ka dei ka bynta ba kongsan ba ki kyrtong kin pynshai ïa la ki nongrim”.
“Hynrei tang kawei haba mih sha kane ka elekshon ngim dei ban ïalam bakla ïa u paidbah”, u la pyntip ba ki don 4 tylli ki PHC ha ka Sohra Constituency – ha Laitlyngkot, Swer, Laitryngew bad Khadarshnong. “Kine ki hap ha ka Khatarshnong-Laitkroh Block bad katkum ki kyndon ka IPHS ban kyntiew ïa ka PHC sha ka CHC donkam ïa ka jingdon briew kaba long 80 hajar ha ki jaka lum bad 1 lak 20 hajar ngut ha ki jaka madan”, u la ong.
Da kaba ong ba dang don ka jingdon briew tang 50 hajar ngut, u la ong ba hap ban ïa bud lang ïa ki kyndon watla kwah eh ban don ki CHC. “Ki pyrshang pynban ïalam bakla ïa u paidbah hynrei dei ban kynmaw ba ki la ïoh ka lad ban mih khmat da ka jingkyrshan u paidbah naduh u snem 2013 haduh u snem 2018 hynrei kaei kaba phi la leh ha kata ka por ba phi long MLA”, u la ong.
U la ong, “Ka suk ban kynthoh ïa kiwei haba ki don ha ka shuki hynrei phi klet pat ha ka por ba ki long MLA bad don ha ka shuki kaei kaba phi la leh ba na ka bynta ka Constituency baroh kawei. Dei ban kren ïa ka jingshisha na ka bynta u paidbah bad ka jingkynthoh bad ka jingbishar kaba khatduh eh ka dei na u paidbah hi jong ka Constituency kiba ïohi, ban sngap bad shim ïa ka rai ha ka 27 tarik u Rymphang, 2023.