Buh thong u Bah Dasakhiat ban pynïoh jaka sumar ba biang ha Nongkrem

Shillong, Rymphang 3: U kyrtong ka National People’s Party (NPP) na Nongkrem constituency uba dei u MLA ka Mawhati, u Bah Dasakhiatbha Lamare u la pynpaw ba haduh 200 percent ka jingkyrmen u don ba un jop ia ka election na ka constituency ba thymmai.
U Bah Lamare uba la jop kum u MLA ka Mawhati constituency ha u snem 2018 bad ha kane ka election 2023 un ïakhun noh na Nongkrem constituency u la thep kyrteng hynne ka 3 tarik Rymphang.Haba jubab ïa ki jingkylli halor ki jingshah kynthoh ba u sam pisa bad blanket hapoh ka constituency, u Bah Lamare u la ong, Ki jingkynthoh kin wan beit lada phi sam ne phim sam ruh, kiba pyrshah kin kynthoh beit bad kiba kyrshan kin ïaroh beit, kadei ka mon jong u paidbah. “Ka jingkynnoh ba ka don ka jingpyndonkam pisa ha Nongkrem kadei kaba bakla, hooid ki jingïarap ngi ai, kiba ïakhun pyrshah bad nga ruh ki ai ki jingïarap haba ki lah, ban ong haduh ba pyndonkam da ka pisa te kam don,” la ong u kyrtong ka NPP.
Haba kylli ia ka thong ba kwah ban leh lada u jop kum u MLA, u Bah Lamare u la ong ba ka thong bha hakhmat duh ba u buh ka long ban wanrah ïa ki jaka sumar, namar ha Nongkrem constituency haduh mynta ka don tang kawei ka PHC ha Smit.Halor ka jingmih noh jong u na Mawhati ban ïakhun pat na Nongkrem, u la ong ba u la mih ban ïakhun na Nongkrem namar kadei ka jingkwah ki paidbah, bad ka jingmih noh pat na Mawhati kam dei kaba u la shu leh lyndet, hynrei u la mih da ka jingsngewthuh jingmut bad ki nongkyrshan jong u. “Ha Mawhati u don da uwei u kyrtong ba ïeng ha ka jaka jong nga bad khlem pep ki nongkyrshan jong nga kin kyrshan ia u,” la ong u Bah Lamare.