Jowai, Rymphan 3 : U ma Sngawbhalang Dhar uba dei ruh u MLA na ka 1-Nartiang Constituency mynta ka sngi ha ka jingïalang paidbah ba la pynlong da ka National People Party (NPP) ha mandan Jrisaleiñ, ula khot ka jingïatreilang da kaba ong “ban lait na ka jingïashrut bad ban ïoh ïa ka jingïatylli ka donkam ïaka Ri-lum Jaiñtia ban pynjop don burom ia ka NPP na baroh ki 7 tylli ki constituency.
Ula kyntu ïa ki paidbah ka Ri-lum Jaiñtia ba kin ai ka jingkyrshan ba pura ïa ka NPP ha kane ka kynti, ula ong kiba bun hi kim shym la ïaroh ïa ki kam ba bha bala pynduh thiah pynduh dem ïa kane ka sorkar MDA ha ki por ka jingïakhun Covid-19, hynrei la ïohi pynban khamtam ha ki Social Media kila don shibun ki jingshah kynnoh kiba lai phew jait.
“Ka Jaiñtia Hills District ka dei ban long ka District kaba kiew bha ha baroh ki liang, lyngba ki jingkyrkhu kiba wan ha kine ki san snem ba la dep”, ong ma Sniawbhalang Dhar da kaba pynkymmaw ïa ki ar tylli ki Block, ki surok, ki Police Station, ki Sub-Center ki PHC, CHC nalor kiwei kiwei de kiba la pynïoh hapoh ka Jaiñtia Hills.
Ula pynrem jur ïa ki jingkren u ma R.C Laloo halor ka jingshah ieh beiñ jong ka sor Jowai, da kaba u ong kumno pat ïa ki project kiba la sah teng da ki phew phew snem la lah ban pyndep lyngba u MLA ba ma Wailadmiki Shylla. Ula ai nuksa ïa ka wah Umngot Project, ym tang kata ka sorkar kala mynjur ruh ban pynlong ïa ka sor Jowai kum ka Smart Town, kumjuh ïa ka Mini Secretariat, ki surok ba bun kum ka Jowai sha Moophlang namar kiba bun ki MLA kim shem la lah ban pyndep hynrei mynta hapoh ka jingïalam ka NPP la pyndep noh.
Shuh shuh u ong ka NPP ka long kaba ïapher bha nadong shadong lada ïanujor bad kiwei, ha ka NPP ki don kawei ka jingmut khlem da don satia kita ki team A, B ne C.
Ula kynthoh jur ïa ki party kiba ïatreilang bad ka MDA ha kine ki snem ba la dep kiba la don bynta lang ha kiba bun ki kam, hynrei ynda la jan ka Election kiba wanrah pynban ïa ki issue ban pynrem ïa ka NPP, ong u ma Sniawbha.
Ula kular ruh ha kaba ïadei bad ka issue jong ki ñiut ha Jowai ula pyntikna ban pynbeit noh ïa kane ynda kin wan biang ha ka bor shynshar namar mynta kiba bun hi ki wanrah pynban da kam politic.
Kane ka dei ka por ba biang eh ban wanrah ïa ka jingïatylli da kaba pynjop don burom ïa ki 7 ngut ki kyrtong ka NPP napoh ka Ri-Lum Jaiñtia ha ka 2 tarik u Rymphang kaba dei ka sngi ban rai jop ïa ki MLA pynkut u ma Sniawbhalang Dhar.
