Thep kyrteng 6 ngut ki Congress, 2 Independent, 1 UDP

Shillong, Rymphang 03: Ki san ngut ki kyrtong jong ka seng Congress ha East Khasi Hills, kiba dang long ki khmat thymmai ban aireng ha ka elekshon sha ka ïingdorbar Thawain ka Jylla ka ban sa long ha ka 27 tarik u Rymphang, 2023 ki la thep kyrteng ha ka 3 tarik u Rymphang, 2023 ha ophis jong u Deputy Commissioner ha Shillong.
Kine ki san ngut ki kyrtong jong ka Seng Congress ki long u Bah Osborn Kharjana u ban aireng na Sohiong Constituency, u Bah Gopal Stone Hynniewta u ban ïakhun na Mawsynram, u Bah Dannyson Kurbah na Mawphlang, u Bah Marbud Dkhar na Mawlai, u Bah Nehru Suting na Pynursla bad u Bah Sardonic Nongkhlaw na Nongkrem Constituency.
Haba kren sha ki lad pathai khubor, u kyrtong ka Congress na Mawlai u Bah marbud Dkhar u la ong ba ka jingïakhun elekshon jong u ha kane ka kynti kam dei tang na bynta ki paidbah nongshong shnong ka Mawlai Constituency hynrei jong ka jylla baroh kawei.
“Nga ïakhun ïa kane ka elekshon ym tang na bynta ki paidbah ka Mawlai hynrei ruh kiba shong ha khappud, nga ïakhun na bynta ki para ri kiba shah ieh beiñ ha ka sorkar, nga ïakhun na bynta ka jingïatylli ka jaidbynriew hi baroh,” u la ong.
Shuh shuh u la ïathuh ba ka thong kaba ha khmat eh kaba u buh na bynta ka Mawlai ka long ban shna ïa ki ïing baduk khang ba kito kiba duna ka kamai kajih kin ïoh ïa ka jaka shong jaka sah kaba bit kaba biang.
U Bah Nehru Suting u kyrtong ka Congress na Pynursla u ïathuh ba kane ka jingïakhun na Pynursla ka la dei lupa ka jingïakhun kaba u la thikna ban jop namar ki paidbah ki la sngewthuh ïa ka jingshah thok ha u MLA bad ka jingpynleit jingmut kyrpang tang na bynta ki kontraktor.
Haba kylli ïa ka daw kaba u la leit ban ïakhun noh na ka Congress wat la u dei u kyrtong na ka UDp na u 2018, “Ka UDP ha u 2018 ka la kylla ka UDP kaba la pheil na bynta u paidbah. Aiu kine ki myntri ka UDP ki leh na bynta ka jylla bad dei na kane ka daw nga leit sha ka Congress ka jhad Titanic kaba thymmai.”
U la ong ruh ba kiba bun ka thong kaba u don na bynta ka Pynursla bad ka jylla hi baroh kawei.
Kawei na ki mat kaba u kwah ban leh ka dei ban pyndam noh ïa ka Reservation Policy, “namar kane ka Reservation Policy ka la pynpharia pynban ïa ka jylla hapdeng ki Khasi- Jaintia bad Garo dei ban pynïakhun noh beit tang kum kawei ka kynhun,” u la ong.
Shuh shuh na ka liang kiwei ki kyrtong ki la pynpaw ba ki don ka jingshaniah ba skhem ba ka jylla kan ailad ïa ka Congress namar ki la sngewthuh ïa ka jingïapher ka jingtreikam ka Congress ha ki snem kiba la leit.
Nalor kine, ki don pat sa arngut ki Kyrtong shimet kiba la thep kyrteng ha kane kajuh ka sngi kiba kynthup ïa u Bah Donkupar Massar na Pynursla Constituency, u Bah Jubanlang Kharbihkhiew u ban ïakhun na Pynthorumkhrah bad u Bah HDR Lyngdoh u kyrtong ka UDP na Sohïong.