Paw ka kyrteng u Bah Ransom Sutnga ba pyllait skhim u Conrad, mudui ka UDP sha u CEO

Shillong, K’lyngkot, 03: Ka United Democratic Party (UDP) ka la rai ban mudui sha u Chief Electoral Officer (CEO) jong ka Jylla halor ka jingpyllait ïa ka skhim Chief Minister Special Development Fund (CMSDF) da u Myntri Rangbah ka Jylla ha ka 18 tarik, Kyllalyngkot, 2023 lyngba ka ophis jong u Deputy Commisioner, Development Branch, East Khasi Hills District kaba kot T.58.76000.
Ha ka jingïakren bad ki lad pathai khubor ha ka sngi Thohdieng u Vice President jong ka UDP u Bah Allantry F. Dkhar u la ong, katkum ba ka paw na ka Work Order, ki don 10 tylli ki kam pynroi kiba la kdew ba la ai sha ki shnong kiba hapoh ka North Shillong Constituency bad ha West Shillong Constituency.
“Katkum kane ka Work Order ka pynpaw ba ka tarajur u Myntri Rangbah ka kham noh sha u kyrtong jong ka North Shillong bad ïa kane ka Work Order la shem ba la phah kopi ruh sha u Bah Ransom Sutnga na Mawkhar kum ka jingpyntip,” u la ong.
U la ong ba katkum kane ka Work Order, la pynpaw ïa ka jingshna ïa ka Community Hall ha Jaïaw Lower Lansolane Block, ka shna pynbha ïa ka bad maramot ïa ka Community Hall jong ka Dorbar Shnong Mawkhar, ka jingpyndait ïa ki CCTV ha Upper Jail Road, ha Lower Jail Road, ha Lawmali, ha Jaïaw Pdeng, ha Police Bazaar bad ha Thana Road, ka jingshna pynbna bad maramot ïa ka Jaïaw Community Hall, ka jingshna pynbna bad maramot ïa ka Short Round Road LP School ha Forest Colony bad kawei ha West Shillong ka dei ka jingshna ha JJM Nicholas Roy Model Trust ha Lumdiengjri Shillong.
“Mynta ïa ka kyrteng jong ki nongïoh jingmyntoi ym shym la kdew satia hangne, hynrei haba phi ai ïa ki kam pynroi sha ki Dorbar Shnong khamtam haba shna ïa ki Community Hall dei ban ai kopi ruh sha ki Rangbah Shnong lane sha ki Secretary Shnong. Hynrei kumba ka paw hangne, ka tarajur ka kham noh sha u kyrtong ka NPP jong ka North Shillong namarba ka kyrteng jong u ka paw ha ka nombar ka saw kum ka jingpyntip katba ka kyrteng jong ka Dorbar Shnong lane u Secretary Shnong kam paw satia,” la ong u Bah Dkhar.
“Ngin sa phah ïa ka jingthoh sha u Chief Electoral Officer ba un bishar ïa kane ka kam halor ka jingnoh tarajur sha u kyrtong jong ka NPP,” u la bynrap.
“Lada phi dang kynmaw, wat u MP jong ka Rajya Sabha u Dr. WR Kharlukhi u la pynbna paidbah ïa ka kyrteng jong u Bah Ransom Sutnga ha ka jingïalang kaba la long ha Khasi National Dorbar Hall ba un long u kyrtong ka NPP wat haba u dang long u Executive Engineer jong ka tnat PWD,” la bynrap u Bah Dkhar.
“Ngin ieh ha ka jingstad jong ki paidbah kumno ban rai la kane ka kam ka dei badei lane ka dei ka jingnoh tarajur jong u Myntri Rangbah sha u kyrtong ka party jong u,” ong shuh shuh u Bah Dkhar.