Nga suk ban jop namar kiba ju pyrshah ki la wan kyrshan ïa nga: Bah Brol

0

Mairang, Rymphang 03: U Bah H. Brolding Nongsiej, MLA jong ka Mawthadraishan bad kyrtong ka UDP, u la ong ba ka elekshon MLA 2023 kan long kaba suk bha ïa u.
Haba ïakren bad ki nongthoh khubor hadien ba ladep thep kyrteng ha ophis DC Mairang, u Bah Brol, u la ong ba ka daw ba kan pynsuk ïa u ha kane ka elekshon na ki elekshon baroh baladep, kadei namar ba kiba bun ki riew rangbah kiba ju ïaleh pyrshah ïa u ha ki elekshon baladep mynta ki la wan kyrshan ïa u. Kine ki long naduh ki rangbah kiba la ju ïakhun ïa ki elekshon baladep kum u Bah Pius Kurbah, President barim ka Congress Mawthadraishan, Bah Damien Marshiangbai, President barim ka HSPDP Mawthadraishan, u Bah BB Warjri, MDC barim ka Mawthadraishan. “Nalorkine, ki dang don bun ki rangbah kibym ju kyrshan ïa nga, mynta ki la wan lut bad nga”, u la ong.
Nalorlata ruh u la ong ka liang kaba ju ïakhun bha bad u,kata ka HSPDP ka pait arliang, namar ba ka Kong Biolinda Lyngdoh Nonglait, kaba ïakhun na ka HSPDP ha u 2018 mynta ka la leit ïakhun noh na ka NPP bad na ka HSPDP lamih ïakhun noh u Bah Shakliar Warjri.
Halor ka jingkylli ba kiei kiwei pat ki daw ban pynlong ïa u ban jop ïa kane ka elekshon, u Bah Brol, u la ong ba ha kine ki san snem kum u MLA u la trei shitom ban wanrah bun ki kam pynroi ha Mawthadraishan naduh ki surok, ki lynti ki syngkien, ki jingkieng ha kylleng kylleng ki Shnong ka Mawthadraishan. Ha kaba ïadei bad ka koit ka khiah, u la pynïoh skhim ban pynheh ïa kilai tylli ki PHC, kata ka Kynshi, ka Myriaw bad Maroid kiba na ka 5 jingthiah mynta ki la don 10 jingthiah. “Lada ki paidbah ki ailad biang ïa nga sa mynta ka kynti, ngan trei shitom ban wanrah sa ka CHC ha Mawthadraishan Block”, u la ong.
U la ïathuh ba u la trei shitom ruh halor ka jingkyntiew ïa ka pule puthi da kaba pynïoh skhim na ka ADB haduh lai tylli ki skul kiba hap ha Mawthadraishan, nangta 15 tylli ki skul lyngba ka skhim na ka NEC kaba ka jingmang pisa ka long 30 lak tyngka kawei ka skul. “Kum ka Party ngi la rai ruh ban ïakhun ban wanrah sa ka College ha Mawthadraishan”, la ong u kyrtong ka UDP.
Na ka bynta ki Samla u Bah Brol, u la ong ba un bteng ban pynlong ïa ka Coaching Centre kaba u la sdang ha kine ki snem baladep na ka bynta ban ai jinghikai ïa ki samla haba wad kam wad jam kum kaba ïaleh ïa ka eksam DSC, MPSC bad kiwei kiwei. Nalorkata u la ïathuh ba la pynbha ruh ïa ki Madan ïalehkai da kaba shan ruh bad ki Gallery.
Uwei pat u kyrtong u ba la thep kyrteng mynta ka sngi, udei u Bah Fourteen Lyngkhoi u ban ïakhun na ka Seng Congress. U Bah Lyngkhoi u la ong ba u mih kyrkieh ban ïakhun ïa kane ka elekshon namar ka jingsahdien ka Mawthadraishan Constituency.

Leave A Reply

Your email address will not be published.