Ka la don ka jingïakren ba ngan ïakhun na ka UDP hynrei ka UDP ka ïakren ruh bad u Bah Prestone: Don Massar

By Mawphor News Desk On Feb 4, 2023

Shillong, Rymphang 03: U MLA barim ka Nongshken Constituency uba la pynkhreh ruh ban aireng ha kane ka elekshon kum u kyrtong shimet na Pynursla Constituency u Bah Donkupar Massar ha ka sngi Thohdieng u la ïathuh ba ka jingïakhun jong u kum u kyrtong shimet ka dei hadien ba ka jingïakren jong u bad u ka UDP kam shym la seisoh namar ha kajuh ka por ka UDP ha kata ka por ka la don ka jingiakren bad u Bah Prestone ban ïakhun noh na ka UDP.
Ïa katei u Bah Don u la ïathuh haba kren sha ki lad pathai khubor hadien ba u la dep ban thep kyrteng kum u kyrtong shimet.
“Ka la don ka jingïakren bad ki nongïalam ka UDP ba ngan ïakhun noh na ka UDP, u President ka UDP u la khot ïa nga ban ïakren sha ïing sah jong u na bynta kane hynrei kane ka la pulom noh namar ha kato ka por ka UDP ka ïakren ruh bad u Bah Prestone Tynsong u Symbud Myntri Rangbah u MLA ka Pynursla ba un ïakhun noh na ka UDP,” ong u Bah Don Massar.
U la ong ba hadien ba u la ïakren bad u nongïalam ka UDP na ka liang jong ki ki la ong ba kin sa kynjoh ktien ynda ki la dep ïakren bad u Bah Tynsong, “hynrei kim shym la ai ktyien bad kum u riew rangbah ngam lah ban shu leit tied jingkhang jubor haba kim mon ban ai tiket,” u la ong.
Shuh shuh u la ong ba ka jingaikhun jong u kum u kyrtong shimet kam dei shuh kaba dang thymmai namar naduh u 2008 mynba u jop kum u MLAka Nongshken u la jop kum u kyrtong shimet.
“Ki paidbah ka Pynursla ki tip bha ïa nga wat la nga rem ha u 2013 hynri ngam ieh satia ïa ki bad ki tip ruh ba ka jingjop kum u kyrtong shimet ka kham pynsuk ïa ki namar kito kiba jop na ki party lada ki paidbah ki donkam eiei ïa u MLA kin hap leit mih shuwa sha ki nongïalam ka party,” u la ong.
Haba kylli halor ka jingmih ïakhun jong u kum u kyrtong shimet wat hadien ba ka kurim jong u pat ka Kong Grace Mary Kharpuri kan ïakhun na ka NPP la kan don jigktah ne em, “Kan ym don jingktah eiei namar ka kam ïing kan kut ha ki saw kynroh ka rympei ïing bad ka kam saiñ hima kan ïaid la ka jong,” u la ong.
“Ha u 2018 nga la ïakhun kum u kyrtong ka NPP na Ranikor bad i kurim jong nga pat na ka PDF bad kane kam ktah satia ïa ka jingïadei namar ngi don ka jingïasngewthuh jingmut halor kane,” u la bynrap.