Shillong,Rymphang 03 : Ka National People’s Party, hynne ka sngi ka la shim ïa ka rai ban ym pynieng kyrtong shuh na Ranikor Constituency ha kane ka elekshon MLA kaban sa long shen ha ka 27tarik mynta u bnai.
Haba pyntip ia kane, u President ka NPP South West Khasi Hills District Bah Kitborlang Nongrem u la ïathuh ba ïa kane kane ka rai ki la shim hadien ka jingia syllok lang hapdeng ki heh duh ka party ba kynthup naduh u National President Conrad Sangma, National Vice President ka party Bah Prestone Tynsong, Bah Sniawbhalang Dhar bad ruh u Bah Nelbi.
“Kumta hadien ka jingïalang ngi la mynjur ban shim da kawei ka rai kata ban ym pynieng kyrtong shuh na Ranikor,” la pyntip u Bah Kitborlang Nongrem.
Haba kylli ïa ka daw u Bah Nongrem u la iathuh ba ia katei ka rai ki shim kadei namar ba ka por ka la lyngkot palat ba kin jam shakhmat ban aireng ha kane ka elekshon.
Lah ban kdew hangne ba u kyrtong ba ka NPP ka pynieng u Bah Martin M Dangngo u la resaiñ noh dang shen na ka party ban leit iakhun noh na ka BJP.
Hadien katei ka jingresaiñ u Bah Dangngo bad ki nongbud, mardor ka NPP ka la pynlong ia ka jingialang bad shim ruh ïa ka rai ba kin phah arngut ki kyrteng sha ka party kata u Bah Nelbi Sangma bad u Bah Kitborlang ban long ki kyrtong.
Hynrei da katei ka rai hynne ka sngi, la pynshai ba ka party kan pynïeng kyrtong shuh na katei ka constituency.
