Leit ïakynduh ki heh ECI ïa ka longkmie ba pynphai ïa ki tiar ba ai ki Kyrtong

Shillong, Rymphang 03: Shi sngi hadien ba i Kong Purity Phawa, nongthep vote jong ka West Shillong Constituency, i la leit pynphai noh ïa ki tiar kiba i la ïoh na u Kyrtong ka UDP, u Bah Paul Lyngdoh bad u kyrtong ka NPP bad MLA ka Shillong West, u Bah Mohendro Rapsang, ka Election Commission of India (ECI) ka la shimkhia ïa kane ka jingleh jong i, ha kaba ki ophisar kane ka bor pynïaid elekshon ki la leit ban ïakynduh ïa i ban wad jingtip halor kane ka jingjia.
Haba u nongthoh khubor u la buddien halor kane ka jingleit pynphai noh jong i ïa ki bowl ba la ïoh na u Bah Paul bad ïa u Pressure Cooker ba ïoh na u Bah Mohendro Rapsang, i Kong Purity iba shong ba sah ha Lumdiengjri, i la ïathuh ba mynta ka sngi, ki nongpeit pyrman jong ka elekshon ha jylla, kynthup ïa u Sector Officer bad ki Observer ki la wan ïakynduh ïa i ban shim jingkylli bad tip khambha halor kane ka jingleh jong i. “Ngam sngewdei ban ïathuh lut ïa kaei kaba nga ïathuh ha ki bad ngan peit shuwa shano kane ka kam kan poi”, i la ong, da kaba bynrap ba i sngewkmen ba ka ECI kala shimkhia ïa kane ka jingleh jong i.
Lah ban kdew hangne ba i Kong Purity hynnin ka sngi haba kine ki tiar ki la poi ha ïing jong i, wut wut i la mih na ïing ban leit pynphai noh sha ki nongai da kaba ong ba kine ki tiar kidei tang ki jingpynbieit ha ka por elekshon bad ka jingleit pynphai jong i ïa kine ki tiar ka long ban pynsngewthuh ïa kito kiba mih shakhmat ban shakri paidbah kum ki nongmihkhmat kim dei ban long tang ki nongsam tiar ne ki distributor, hynrei kidei ban long ki nongthawaiñ ne kita ki legislator.
Kane ka jingleh jong i, ka la ïoh ïa ka jingïaroh na kiba bun ki liang bad bun ki la ong ba kadei ka jingleh kaba dei bad kaban long ruh kum ka jinghikai na ka bynta ki nongthep vote ka jylla.
Ïaroh u Bah Mohendro ïa ka Kong Purity
U Kyrtong ka NPP uban ïakhun na 18 West Shillong u Bah Mohendro Rapsang ha ka sngi Thohdieng u la ai jingïaroh ïa ka sienjam kaba ka kong Purity Phawa ka la shim ban leit pynphai noh ïa ki tiar kiba ki kyrtong ki la pynpoi sha ïing jong ka.
Haba kren sha ki lad pathai khubor u Bah Mohendro u la ong ba ka jingpoi ki khiew Pressure Cooker kiba la pynpoi sha ka ïing jongka Kong Purity lyngba ki nongtrei jong ka party kim dei kiba u ai shimet ma u hynrei ka dei na ka MLA skhim kaba u la dep ruh ban da pynlait paidbah ha kine ki khyndiat taiew kiba la dep.
“Ki khiew kiba la pynpoi na ka liang jong nga kim dei kiba nga ai na ka pla jong nga hynrei kiba la mang kyrpang na ka MLA scheme kiba nga la pynlait paidbah ruh haba shit ha bashai ym kum uwei pat u kyrtong uba ïakhun pyrshah ïa nga uba la kynthoh ïa ka jingai Pressure Cooker jong nga katba ïa lade ruh u sam bowl haba rieh bad nga ngeit phi ïohi hi ba ym dei tang ba i pynphai tang sha ïing jong nga hynrei sha ka ïing uwei pat ruh u kyrtong,” ong u Bah Rapsang.
Lah ban kdew hangne ba ha ka sngi Palei ka Kong Purity ka la leit ban pynphai ïa ki bowl kiba la pynpoi da ki nongïalam jong u kyrtong ka UDP u Bah Paul Lyngdoh bad kumjuh ïa u Pressure Cooker ba la pynpoi da ki nongïalam u kyrtong ka NPP u Bah Mohendro Rapsang sha ka ïing sah jong ki.