5 lak ki kam yn pynkha thymmai kular ka NPP ha ka People’s Document-Vision 2022-2023

Shillong, Rymphang, 3: Ka National People’s Party (NPP) ha ka sngi Thohdieng ka la pyllait paidbah ïa ka People’s Document -Vision 2023-28 ryngkat ka jingkular ban pynkha haduh 5 lak tylli kam bad ban plie ïa ki lad aikam na ka bynta ki samla lada ka party kan ïoh ban bat biang ïa u lakam synshar ha ka jylla.
Ïa ka Election Manifesto la pyllait da u National President jong ka NPP u Conrad K Sangma ha ka jingïalang kaba la long ha Jowai, West Jaintia Hills District.
Ha kane ka dulir, ka NPP ka la pynbna ruh ba ka thong jong ka party ka long ban ai jingkyrshan ïa ki nongrep bad ïa ki shnong, nalor kaba pynpaw ïa ki jingjop ba la jer kyrteng kum ka ‘Promises Delivered’ bad ka jingangnud ban pynlong ïa ka jylla Meghalaya kaba kiew artet.
Ha ka jingpyllait paidbah ïa ka People’s Document -Vision 2023-28 la sakhi lang da u National Vice President u Bah Prestone Tynsong, ki MLA ka party kiba kynthup ïa u Bah Sniawbhalang Dhar, u Bah Comingone Ymbon, u Bah Wailadmiki Shylla, ka kyrtong na East Shillong ka Dr. Ampareen Lyngdoh bad kiwei kiwei ki nongïalam.
Ka NPP ka la kdew ruh ïa ki jingtrei kiba manla u snem naduh ba ka party ka la ïoh bat ïa u lakam synshar kiba paw bad ki kam bad ym tang ban shu kular tang ban pynpaw paidbah.
Ka NPP ka la khot ïa kane ka dulir kum ka People’s Document namarba ka la kdew bin pa bin ïa ki jingtreikam na ka bynta ka jylla Meghalaya.
Ka People’s Document ka ong ba ka thong jong ka NPP ka long ruh ban pynkha san lak tylli ki kam bad ïa ki lad aikam na ka bynta ki samla.
Ka thong kaba hakhmat ka long ban phaikhmat sha ki nongseng sam, ka jngohkai pyrthei, ka rep ka riang, ki digital Sectors ha ki jaka sor bad nongkyndong jong ka jylla. La mang lypa ban ai jinghikai ïa ki samla da kaba thaw ïa ki Multi-sectoral Skill Parks, ki jingshah hikai pyntbit shabar bad kiwei kiwei.
Ka NPP ka la ïai pynneh ban kham phai khmat sha ki nongsengkam da kaba pynkha ïa ka PRIME Hub ha baroh ki Block bad ban ai jingkyrshan ïa ki nongsengkam lyngba ka PRIME Scheme. Ka NPP ka la kham ïai ban ha kaba ïadei bad ka jingjop jong ka Best Startup State ha India bad ban ïaid bteng ban kham pynjanai shuh shuh ban btin lynti ïa ki nongsengkam, la pynpaw ka Peoples’ Document.
Ka Party ka la kular ban ïai bteng na ka bynta ban ïakren bad ka Sorkar India ban pynrung ïa ka ktien Khasi bad Garo ha ka Khyrnit Baphra jong ka Riti Synshar ka Ri India bad ban pyntreikam noh ïa ka Inner Line Permit (ILP) ha Meghalaya ïa kaba ladep mynjur da ka Iingdorbar Thawaiñ.
Da kaba pynpaw ba ka NPP ka la pyntyllun shakhmat ban weng ïa ka jingeh ha kaba ïadei bad ka jingpynbeit ïa u pud u sam hapdeng ka Meghalaya bad ka Assam, ka Document ka la pynpaw ba ka Party kan nang ïai bteng ban poi sha ka jingïasngewthuh jingmut ha ka jingïapynbeit pud bad ka Assam da kaba ïasyllok lang bad ki kynhun bapher bapher.
Ka Party ka la kular ban ïada ïa ka kamai kajih jong ki paidbah kiba im ha ki kam tih marpohkhyndew da kaba kyntiew ïa ka rukom tih marpohkhyndew katkum ka juk stad saïan. Ka la ong ba ka Sorkar ba la ïalam da ka NPP ka la lah ban ïoh ïa ka rai kaba paka tam na ka Iingbishar Supreme Court kaba pynthikna ïa ka hok jong ki riewlum halor ka jinglong trai ïa ka khyndew ka shyiap bad ki marpohkhyndew bad ïa ka laisen la lah ban pynïoh sha ki 17 ngut ki briew.
Shuh shuh ka NPP ka la kular ban pynneh ïa ka shongsuk shongsaiñ ha ka Jylla Meghalaya da kaba kham pynlut ban pynjanai ïa ka tnat Pulit, ban pynkhlaiñ ïa ka Cyber Security bad ban buh ïa ki Women Police Station ha baroh ki distrik.
Ka Sorkar ha ki san snem balade ka la pynkha 4 tylli ki civil sub divisions ba thymmai, 9 tylli ki C&RD block, 3 tylli ki Police Station ba thymmai, 8 tylli ki Border Outpost ba thymmai bad 7 tylli ki Police Outpost.
Ka Dulir ka la pynpaw ba ka Party ka la buh thong ban pynstet ïa ka jingïakren bad ki kynhun kieng atiar hapoh ka riti synshar jong ka ri. Katkum ka party, ki kynhun ki la pynpaw ïa ka mon ban don ka jingïakren kaba khlem teh kyndon bad ka Sorkar.
Ha kaba ïadei bad ka jingai jingkyrshan ïa ki samla, ka party ka la ong, kan kham phaikhmat ruh ban ithuh ïa ki riewdonsap ha ka sports ha ka jylla da kaba pynïoh ïa ki tiar ïalehkai naduh kaba shna ïa ki Stadium, ban ai jinghikai, ban wad ïa ki riewdonsap bad ban kyntiew ïa ki jingai jingkyrshan.
Ban kham pynjan ïa ka jingshakri jong ka Sorkar sha ki shnong, ka party ka la ong ba ka thong ka long ban pynkha 1,000 tylli ki Chief Minister’s Facilitation Centers. Ka party ka la thmu ruh ban buh ïa ki Village Community Facilitators (VCF) ki ban pynurlong ïa ki jingtreikam. Ki nongtrei kin ïakynduh markhmat bad ki paidbah haba ki paidbah ki donkam ïa ki marbam, ka penshon bad ban pynsngew ruh ïa kiba bun ki jingeh. Kane kan pynkha ïa ki hajar tylli ki kam bad kan pynthikna ba ki longiing kiba don sha ki jaka ba kyndong tam jong ka Jylla Meghalaya kin ïoh ïa ka jingshakri jong ka Sorkar.
Na ka bynta ki nongrep, ka party ka la ong ba kan ïai bteng ban kyrshan ïa ki nongrep jong ka jylla lyngba ki flagship program kum ka FOCUS bad FOCUS+. Kine ki prokram kin nang ïai bteng bad kin nang kdup ïa baroh ki nongrep jong ka jylla katkum ka jingdon jong ki nongrep. Ka thong ka long ban pynmih kham bun ki mar rep, ban pynsuk ïa ka kit ka bah bad ban pynïaid iew ïa ki mar rep ha ka dor kaba bit. Ka thong jong ka party ka long ban ïai bteng ka jingai jingkyrshan lyngba ka Mission Mode Project bad ban pynmyntoi ïa ki nongrep ha shwa u snem 2023-28. Kine ki jingtreikam ki dei kiba la ai jingjop ïa kiba bun ki nongrep kum ha ka shnong Lakadong ha kaba 13,000 hajar ngut ki nongrep mynta ki la ïoh jingmyntoi, na ka 1,000 ngut san snem mynshwa.
Ka NPP shuh shuh ka la ong ba kan pynïasoh ïa baroh ki shnong lyngba ki surok rong, da ki jingkieng dewbilat bad ki jingkieng nar. Ka la pynpaw ruh ba ka ladep khmih bniah ïa kawei pa kawei ka shnong kumno ban pynïasoh ïa ka Jylla Meghalaya lyngba ki surok. Da kaba pynpaw ba kan pyntreikam ruh lyngba ka skhim jong ka Sorkar Pdeng ban shna ïa ki surok ba thymmai ban pynïasoh ïa ki shnong, ka NPP ka la pynbna ruh da ka skhim ba thymmai ïa kaba la tip kum ka – “Chief Minister’s Village Connectivity Scheme.” Ka party ka la thmu ban weng lut ïa baroh ki jingkieng dieng ha ka jylla bad ban shna thymmai da ka jingkieng dewbilat bad ki jingkieng nar. Lah ruh ban kdew, ha ki san snem baladep, la lah ban shna ïa ki surok ha ka jylla Meghalaya kiba la tam kylla ïa ki surok ba la shna da ki sorkar kiba rim ha ki 20 snem baladep.
Ka paty ka la buh thong ruh ban pynjanai ïa ka jingpynher liengsuiñ, ka jingpyndonkam ïa ka Internet ha ki shnong nongkyndong, ban shna ïa ki IT park, ban shna ïa ki Water Management bad pynïasoh ïa ki pipe um sha kiba bun ki longing.
Ka party ka la thmu ruh ban buh ïa ki Economic Growth Centers bad ki Logistics Hubs ha ki distrik bapher bapher jong ka jylla da kaba ïatreilang bad ki karkhana khnang ba yn dup lah ban pynïohkam ïa kiba bun ki longiing bad ki samla.
Halor ka koit ka khiah, ka NPP ka la ong ba ka jingshna ïa ki jaka ai jingsumar ba thymmai, ka jingpyntreikam ïa ka skhim kaba ïarap ïa ki longkmie bad ki khunlung bad ka Health Insurance Schemes ki la long kiba jop ha kine ki san snem baladep.
Ka party ka la rai ban ïai bteng ban wanrah sa ïa ka Chief Minister’s Affordable Drug Center ba thymmai khnang ba kito kiba shah sumar kin ïoh ban thied ïa ki dawai dashin ha ka dor kaba bit.
Bun na ki skhim kiba rim ki la ai jingmyntoi ïa ki paidbah. Yn sa pyntreikam ïa ki skhim ba thymmai bad ki polisi khnang ban pynlong ïa ka jylla Meghalaya kaba kot ha ka kyrdan kaba nyng kong napdeng ki 10 tylli ki jylla ha ka ri baroh kawei.